CIN Khabar

संसद/सांसद

इन्जिनियर बन्न स्नातकसम्मको अध्ययन र लाइसेन्सको जाँचमा उत्तीर्ण हुनुपर्ने

सीआईएन बुधबार, साउन ४, २०७९, ०३:१२:००

संसद बैठक चलाउनुहुँदै उपसभामुख पुष्पा भुसाल ।

काठमाडौँ । नेपाल इन्जिनियरिङ परिषद् ऐन, ०५५ संशोधन गर्न बनेको विधेयक पारित भएसँगै अब इन्जिनियर बन्नका लागि स्नातकसम्मको अध्ययन पूरा गरेपछि लाइसेन्सको जाँच दिनुपर्ने भएको छ ।

प्रतिनिधिसभाबाट नेपाल इन्जिनियरिङ परिषद् (पहिलो संशोधन) विधेयक आज सर्वसम्मतिले पारित भएको छ ।

भौतिक पूर्वाधार तथा यातायात मन्त्री मोहम्मद इस्तियाक राईले नेपाल इन्जिनियरिङ परिषद् (पहिलो संशोधन) विधेयकमाथि छलफल गरियाेस् भनी प्रस्ताव राख्नुभएकाे थियो ।

छलफलमा सांसदहरुले उठाएको प्रश्नको जवाफमा दिँदै यातायातमन्त्री राईले लाइसेन्स लिन परीक्षा अनिवार्य गरिएपछि गुणस्तरमा उठेको प्रश्नको स्वतः निरुपण हुने बताउनुभएको छ ।

विधेयकले इन्जिनियरिङ परिषद्लाई सातै प्रदेशमा शाखा कार्यालय खोल्न पाउने र अनलाइनमार्फत सेवा प्रदान गर्न सक्नेलगायतका सुविधा दिएको छ ।

वि.सं. २०७६ जेठ २९ गते दर्ता भएको उक्त विधेयक राष्ट्रियसभाबाट २०७६ पुस १४ गते पारित भएपछि प्रतिनिधिसभामा आएको थियो ।

प्रकाशित मिति: बुधबार, साउन ४, २०७९, ०३:१२:००

सीआईएन

सीआईएन नेपालका सामुदायिक रेडियोहरुको नेटवर्क हो ।

प्रतिक्रिया दिनुहोस्