काठमाडौँ । जागृति बाल तथा युवा सरोकार नेपालले रसुवाको भोटेकोशी बाढीपछिको उद्धार तथा राहतसँगै बालबालिका र जोखिममा रहेका समुदायको संरक्षणलाई प्राथमिकता दिन सरकार तथा सम्बन्धित निकायसँग आग्रह गरेको छ।
संस्थाका अध्यक्ष तिलोत्तम पौडेलले प्रेस विज्ञप्तिमार्फत विपद्मा ज्यान गुमाउनेहरूप्रति श्रद्धाञ्जली तथा शोकसन्तप्त परिवारप्रति समवेदना व्यक्त गर्दै घाइतेको शीघ्र स्वास्थ्यलाभको कामना पनि गर्नुभएको छ ।
बेपत्ता नागरिकको खोजी तथा उद्धार र प्रभावितलाई राहत वितरणको कामलाई थप प्रभावकारी, सुरक्षित र निरन्तर बनाउन पनि सम्बन्धित निकायको ध्यानाकर्षण पनि गराइएको छ।
संस्थाका अनुसार विपद्पछि सबैभन्दा बढी जोखिममा बालबालिका, किशोरकिशोरी, ज्येष्ठ नागरिक, अपाङ्गता भएका व्यक्ति तथा अन्य संवेदनशील समूह पर्न सक्छन्।
त्यसैले राहत र उद्धारसँगै उनीहरूको सुरक्षा, संरक्षण र आधारभूत अधिकार सुनिश्चित गर्नुपर्ने आवश्यकता रहेको विज्ञप्तिमा उल्लेख छ।
विशेषगरी विपद्का कारण अभिभावक गुमाएका, परिवारबाट अलग भएका वा अन्य कारणले जोखिममा रहेका बालबालिकाको पहिचान गरी उनीहरूको शिक्षा, स्वास्थ्य, पोषण, सुरक्षित आवास, पुनर्स्थापना तथा मनोसामाजिक सहयोग तत्काल सुनिश्चित गर्न तीनै तहका सरकार र सम्बन्धित सरोकारवालालाई संस्थाले आग्रह गरेको छ।
बालबालिका बेचबिखन र शोषणको जोखिम बढ्न सक्ने विपद्पछिको असुरक्षित परिस्थितिको फाइदा उठाउँदै बालबालिका बेचबिखन, बालश्रम, बालविवाह, हिंसा, दुर्व्यवहार तथा अन्य प्रकारका शोषणमा पर्न सक्ने जोखिम बढ्ने भन्दै संस्थाले स्थानीय तहदेखि राष्ट्रिय तहसम्म प्रभावकारी संरक्षण संयन्त्र परिचालन गर्न माग गरेको छ।
विपद्पछि फोहोरमैला र मृत पशुपन्छी यत्रतत्र छरिन सक्ने तथा सरसफाइ र स्वच्छतामा समस्या आउन सक्ने भएकाले सुरक्षित खानेपानी, सरसफाइ, स्वास्थ्य सेवा तथा रोग रोकथामका उपाय तत्काल प्रभावकारी बनाउन आग्रह गरिएको छ।
जागृति बाल तथा युवा सरोकार नेपालले आफू बालबालिका, किशोरकिशोरी, युवा, पोषण तथा समुदायसँग सम्बन्धित क्षेत्रमा लामो समयदेखि क्रियाशील रहेको जनाएको छ।
प्रकाशित मिति: मंगलबार, भदौ २३, २०८३
