काठमाडौँ । प्रतिनिधि सभाको अन्तर्राष्ट्रिय सम्बन्ध तथा पर्यटन समिति सभापति सुम्निमा उदासले कानुन निर्माणका लागि जनतासँग सांसदलाई जोड्ने सामुदायिक रेडियो प्रसारक सङ्घ (अकोराब) नेपाल र अकोराबद्वारा सञ्चालित सामुदायिक सूचना नेटवर्क (सीआईएन) को अभियानको प्रशंसा गर्नुभएको छ ।
अकोराब/सीआईएनले अभौतिक सांस्कृतिक सम्पदा (संरक्षण) विधेयक २०८१ र पर्यटन विधेयकका बारेमा गरेको "हेलो सांसद" संवाद शृङ्खलामा सरोकारवाला निकायले दिएको सुझाव र विज्ञको रायसहितको प्रतिवेदन सिंहदरवार स्थित समितिको कार्यालयमा आज ग्रहण गर्दै सभापति उदासले प्राप्त सुझावलाई समिति र संसदमा छलफलको आधार बनाउने प्रतिबद्धता जनाउनुभयो ।
अकोराबका कार्यक्रम व्यवस्थापक विशाल भट्टराई र सीआईएन सम्पादक लिलप्रकाश चन्दले दुबै विधेयक बारेको छलफलपछिको प्रतिवेदन सभापति उदासलाई बुझाउनुभएको हो ।
हेलो सांसद संवाद शृङ्खलामा सांसद, सरोकारवाला र नागरिकको विचारसहित छलफल हुन्छ भने उक्त छलफलमा उठेका विषयसमेत समेटेर कानुन व्यवसायी वा विज्ञले तिन महले बनाएर प्रतिवेदन तयार गर्दै आएका छन् ।
प्रतिवेदन बुझ्दै सभापति उदासले कानुन निर्माणका लागि नागरिकको सहभागिता बढाउन कोसिस गरिएको उल्लेख गर्दै रेडियो वा डिजिटल माध्यमबाट जनसहभागिता बढाउन सकिने उल्लेख गर्दै यसरी आउने उचित सुझाव र प्रतिक्रियालाई पनि समितले स्वागत गर्ने बताउनुभयो ।
यही साउन ४ गते अभौतिक सांस्कृतिक सम्पदा (संरक्षण) विधेयक २०८१ का बारेमा सरोकारवालबीच छलफल भएको थियो भने पर्यटन विधेयकको बारेमा केही महिना अघि नै छलफल भएको थियो ।
यूएनडीपी संसद सहयोग परियोजनासँगको सहकार्यमा संवाद शृङ्खला "हेलो सांसद" हरेक विहीवार बेलुका साढे ७ बजे र भोलिपल्ट बिहान साढे ६ बजे सीआईएनमार्फत प्रसारण हुँदै आएको छ ।
प्रकाशित मिति: शुक्रबार, साउन २२, २०८३
