काठमाडौँ । आज राति ठूलो पानी पर्ने पूर्वानुमान गरिएको भन्दै राष्ट्रिय विपद् जोखिम न्यूनिकरण तथा व्यवस्थापन प्राधिकरणले उच्च सतर्कता अपनाउन अनुरोध गरेको छ ।
प्राधिकरणका प्रवक्ता रामबहादुर केसीका अनुसार आज अपराह्न वा साँझदेखि नेपालको पूर्वी भागमा भारी वर्षाको सम्भावना छ र विशेषगरी आज राति ठूलो पानी पर्न सक्ने भएकाले बढी सजग रहनुपर्ने छ ।
जोखिमयुक्त क्षेत्रका नागरिकको सुरक्षाका लागि जिल्ला प्रशासन कार्यालयहरूलाई तयारी अवस्थामा रहन भनिएको पनि प्रवक्ता केसीले बताउनुभयो ।
नेपाल जल तथा मौसम विज्ञान विभागका अनुसार गएको रातभरि कोशीदेखि बागमतीसम्म लगभग सबै ठाउँमा एकनासको हल्का पानी परेको छ भने हिमाली भेगतिर हिउँ परिरहेको छ ।
मध्यरातपछि भने लुम्बिनी र गण्डकीका पूर्वी भागमा पनि पानी पर्न सुरु भएको जानकारी दिँदै विभागले आज दिनभरि पनि पानी पर्ने र दिइएका सूचना र चेतावनीको पालना गर्न अनुरोध गरेको छ ।
प्रकाशित मिति: शुक्रबार, कात्तिक १३, २०८३
