काठमाडौँ । संयुक्त अधिराज्य (बेलायत) को औपचारिक भ्रमण पूरा गरेर प्रधान सेनापति अशोक राज सिग्देल आज स्वदेश फर्कनुभएको छ ।
प्रधानसेनापति सिग्देललाई त्रिभुवन अन्तर्राष्ट्रिय विमानस्थलमा बलाधिकृत रथी प्रदीप जङ्ग केसीले स्वागत गर्नु भयो।
भ्रमणका क्रममा संयुक्त अधिराज्य (बेलायत) का सेनाध्यक्षलगायत उच्च सैनिक अधिकारीहरूसँग शिष्टाचार भेट गर्नुका साथै वेल्सको ब्रेकनस्थित अन्तर्राष्ट्रिय सैनिक अभ्यास ‘एक्ससाइज क्यामब्रियन पट्रोल २०२६’ को निरीक्षण पनि उहाँले गर्नुभएको सैनिक जनसम्पर्क तथा सूचना निर्देशनालयले जनाएको छ ।
उक्त अभ्यासमा स्वर्ण पदक प्राप्त गर्न सफल नेपाली सैनिक टोलीका सकलदर्जालाई प्रधान सेनापति प्रशंसा निशानबाट सिग्देलले सुशोभन गर्नुभएको जनाइएको छ ।
यस किसिमको भ्रमणले दुई देशबीच सदियौँदेखि रहँदै आएको सौहार्दपूर्ण द्विपक्षीय सैनिक सम्बन्धलाई अझ सुमधुर एवम् प्रगाढ बनाउन मद्दत पुर्याउने विश्वास लिइएको पनि नेपाली सेनाले जनाएको छ ।
प्रकाशित मिति: बुधबार, असोज २८, २०८३
