काठमाडौँ । सशस्त्र प्रहरी महानिरीक्षक नारायण दत्त पौडेलले सशस्त्र प्रहरी कर्मचारीहरुलाई चाडपर्वको समयमा आम नागरिकको सेवा र सुरक्षालाई ध्यानमा राखी परिचालन हुन निर्देशन दिनुभएको छ ।
सशस्त्र प्रहरी बल नेपाल प्रधान कार्यालयबाट सम्पूर्ण सशस्त्र प्रहरी कर्मचारीहरुलाई महानिरीक्षक पौडेलले लाइभ भिडियो स्ट्रिमिङमार्फत यस्तो निर्देशन दिनुकासाथै आउँदै गरेको विजया दशमी, शुभ दीपावली र छठ पर्व तथा नेपाल संवत् ११४७ को अवसरमा शुभकामना समेत व्यक्त गर्नुभएको छ ।
उहाँले सङ्गठनका प्रथम सशस्त्र प्रहरी महानिरीक्षक स्व.कृष्णमोहन श्रेष्ठ लगायत राष्ट्र सेवामा अमूल्य जीवन उत्सर्ग गर्ने सम्पूर्ण शहिदहरुप्रति हार्दिक श्रद्धाञ्जली अर्पण गर्नुहुँदै घाइते, अपाङ्ग भई उपचारत सशस्त्र प्रहरी कर्मचारीहरुको स्वास्थ्य लाभको कामनासमेत गर्नुभयो ।
सशस्त्र प्रहरी महानिरीक्षक पौडेलले चाडपर्वका बेला लोकमार्गहरूमा हुनसक्ने सवारी दुर्घटना, बजार तथा औद्योगिक क्षेत्रमा चोरी–लुटपाट, सीमापार अवैध चोरी–निकासी, पैठारी, राजस्व चुहावट र लागूऔषधको ओसारपसार जस्ता अवाञ्छित गतिविधिहरू नियन्त्रण गर्न ‘चाडपर्व लक्षित विशेष सुरक्षा योजना, २०८३’ लाई उच्च सतर्कताका साथ कार्यान्वयन गर्न पनि उहाँले निर्देशन दिनुभयो ।
-1791882279.JPG)
सशस्त्र प्रहरी महानिरीक्षक पौडेलले नागरिकहरू हर्षोल्लासकासाथ चाडपर्व मनाइरहँदा सुरक्षाकर्मीहरूले भोक, प्यास, घाम, पानी र व्यक्तिगत सुख–सुविधाको पर्वाह नगरी अनवरत रूपमा कर्तव्यपथमा खटिनु नै राष्ट्रसेवकको वास्तविक पहिचान र धर्म भएको स्मरण गराउनुहुँदै हालै रसुवाको भोटेकोशी नदीमा आएको बाढी तथा मुलुकका विभिन्न भागमा भएका विपद्का घटनाहरूमा आफ्नो ज्यानको बाजी थापेर खोज, उद्धार र राहतमा खटिएका सशस्त्र प्रहरी कर्मचारीहरूको प्रशंसा गर्नुभयो ।
उहाँले सीमा सुरक्षा, विपद् व्यवस्थापन, नागरिकको जीउधनको संरक्षण तथा आन्तरिक सुरक्षाकासाथै संयुक्त राष्ट्रसंघीय मिसनहरुमा आफ्नो जिम्मेवारी निर्वाह गर्दै स्वदेशी तथा विदेशी भूमीमा चाडपर्वका समयमा आफ्नो कर्तव्यमा खटिनुहुने सम्पूर्ण राष्ट्रसेवकहरुको समर्पण, अनुशासन र सेवाभावप्रति कृतज्ञता व्यक्त गर्नुभयो ।
प्रकाशित मिति: मंगलबार, असोज २७, २०८३
