हुम्ला । हुम्लाको चङ्खेली गाउँपालिका–२ स्थित बागेढुङ्गा सामुदायिक वनमा जडीबुटी ‘कटुको’ सङ्कलन गर्न पुगेका मुगुका स्थानीयमध्ये एक जनाको मृत्यु भएको छ भने दुई जना अझैँ सम्पर्कविहीन रहेका छन् ।
मुगुको मुगुम कार्मारोङ गाउँपालिका–९ पापु र छाइलबाट जडीबुटी सङ्कलनका लागि हुम्ला पुगेका २२ वर्षीय गणेश बुढाको मृत्यु भएको मुगुका सहायक प्रमुख जिल्ला अधिकारी धनकृष्ण पाण्डेले बताउनुभयो।
उहाँका अनुसार भदौ २८ गते मुगुम कार्मारोङ गाउँबाट १३ जना स्थानीय जडीबुटी सङ्कलनका लागि हुम्लाका विभिन्न सामुदायिक वनतर्फ गएको जानकारी प्रशासनमा आएको थियो ।
तीमध्ये एक जनाको मृत्यु भएको, दुई जना सम्पर्कविहीन रहेको,३ जना घर पुगिसकेको र बाँकी ७ जना मिमी प्रहरी चौकीको सम्पर्कमा आएको जिल्ला प्रहरी कार्यालय हुम्लाका प्रवक्ता जनकबहादुर सिंहले बताउनुभयो ।
घटनाको वास्तविक कारण भने अझै स्पष्ट भइसकेको छैन । घटनाबारे बुझ्न मिमी प्रहरी चौकीमा हुम्ला र मुगु दुवै पक्षका दुई–दुई जनालाई बोलाएर छलफल भइरहेको बताउनुभयो ।
मुगुका स्थानीयका अनुसार मुगु र हुम्लाको सीमावर्ती क्षेत्रमा रहेका कतिपय सामुदायिक वन दुवै जिल्लाका बासिन्दाले प्रयोग गर्दै आएका छन् । सोही आधारमा आफूहरू आफ्नै क्षेत्रको सामुदायिक वनमा जडीबुटी सङ्कलनका लागि गएको उनीहरूको भनाइ छ ।
बागेढुङ्गा सामुदायिक वन र नेप्का सामुदायिक वनलगायतका क्षेत्रमा अनुमति बिना जडीबुटी सङ्कलन भइरहेको भन्दै वनका पदाधिकारीले अनुगमन गरेका थिए ।
बागेढुङ्गा सामुदायिक वनका अध्यक्ष रंगबहादुर शाही सहितको टोली अनुगमनमा पुगेपछि जडीबुटी सङ्कलन गरिरहेका व्यक्तिहरू भागेको बागेढुङ्गा सामुदायिक वनका अध्यक्ष रङ्गबहादुर शाहीले बताउनुभयो । उहाँका अनुसार खोजीका क्रममा एक जनालाई नियन्त्रणमा लिएपछि अन्य नौ जना पनि सम्पर्कमा आएका थिए ।
प्रकाशित मिति: सोमबार, असोज १२, २०८३
