हुम्ला । हुम्लाको अदानचुली गाउँपालिकाले आगामी आर्थिक वर्ष २०८३र८४ को साउन १ गतेदेखि पहिलो पटक इ–हाजिरी प्रणाली लागू गर्ने भएको छ। दुर्गम क्षेत्रमा कर्मचारी नियमित कार्यालयमा नबस्ने, महिनौँ अनुपस्थित भएर आर्थिक वर्षको अन्त्यमा काम सकाउने र सेवाग्राहीले सास्ती भोग्नुपर्ने गुनासो बढिरहेका बेला गाउँपालिकाले डिजिटल प्रविधिमार्फत कर्मचारीको उपस्थितिलाई व्यवस्थित बनाउन लागेको हो।
गाउँपालिकाका प्रमुख प्रशासकीय अधिकृत चन्द्रवीर शाहीका अनुसार इ–हाजिरी प्रणाली लागू भएपछि गाउँपालिका, वडा कार्यालय, स्वास्थ्य संस्था र विद्यालयका कर्मचारी तोकिएको समयमा कार्यालयमा उपस्थित हुनुपर्नेछ। यसले कर्मचारीमा अनुशासन र नियमितता बढ्नुका साथै नागरिकले समयमै सेवा पाउने उहाँकाे भनाइ छ।
उहाँका अनुसार अब कर्मचारीको आगमन र बहिर्गमनको वास्तविक समय प्रणालीमा अभिलेख हुने भएकाले महिनाको अन्त्यमा एकैचोटि हाजिरी भर्ने वा पछिल्ला दिनको हाजिरी मिलाउने पुरानो अभ्यास अन्त्य हुनेछ। साउन महिनादेखिको तलब, भत्ता तथा अन्य सुविधा पनि कर्मचारीको वास्तविक उपस्थितिका आधारमा मात्रै भुक्तानी गरिने व्यवस्था गरिएको छ।
गाउँपालिकाले सुरुमा इ–हाजिरी प्रणाली गाउँपालिकाको केन्द्र श्रीनगरस्थित कार्यालयमा जडान गर्ने र त्यसपछि सबै वडा कार्यालय, स्वास्थ्य संस्था तथा विद्यालयमा विस्तार गर्ने योजना बनाएको छ। प्रणाली पूर्ण रूपमा सञ्चालनमा आएपछि गाउँपालिकाको केन्द्रबाटै टाढाका कार्यालयहरूको कर्मचारी उपस्थितिको विवरण क्लाउड प्रणालीमार्फत तत्काल अनुगमन गर्न सकिनेछ।
गाउँपालिका अध्यक्ष मोहन विक्रम सिंहले कर्मचारी नियमित रूपमा कार्यालयमा भेटिन थालेपछि सेवाग्राहीले छिटो र सहज सेवा पाउने र स्थानीय सरकारप्रति जनविश्वास बढ्ने विश्वास व्यक्त गर्नुभयो। उहाँका अनुसार संघीय सरकारको सूचना प्रविधि विभाग र संघीय मामिला मन्त्रालयको डिजिटल सुशासन सम्बन्धी नीतिअनुसार गाउँपालिकाले यो प्रणाली कार्यान्वयन गर्न लागेको हो।
सूचना प्रविधि शाखाका सूचना अधिकृत लोकसरी बुढाका अनुसार हालसम्म करिब २३ जना कर्मचारीको बायोमेट्रिक विवरण संकलन गरिएको छ। केही कर्मचारीले अझै बायोमेट्रिक नगरेकाले त्यसका लागि सूचना जारी गर्नुपर्ने अवस्था आएको उहाँले बताउनुभयो।
जिन्सी शाखा प्रमुख हंस महताराका अनुसार इ–हाजिरी प्रणालीका लागि आवश्यक उपकरण गत वर्ष नै खरिद गरिएको भए पनि विभिन्न कारणले सञ्चालनमा आउन सकेको थिएन। नयाँ प्रमुख प्रशासकीय अधिकृत आएपछि प्रक्रिया अघि बढाएर अब कार्यान्वयनको अन्तिम तयारी गरिएको हो।
स्थानीय नागरिकले पनि कर्मचारी नियमित रूपमा कार्यालयमा नबस्ने, सामान्य कामका लागि पटक–पटक धाउनुपर्ने र वर्षभरि सेवा नपाई आर्थिक वर्षको अन्त्यमा मात्रै काम हुने परम्पराको अन्त्य गर्न इ–हाजिरी प्रणाली प्रभावकारी हुने विश्वास व्यक्त गरेका छन्। गाउँपालिकाले यो प्रणालीलाई स्थानीय तहमा सुशासन, पारदर्शिता र प्रभावकारी सेवा प्रवाह सुनिश्चित गर्ने महत्त्वपूर्ण कदमका रूपमा लिएको छ।
प्रकाशित मिति: बिहीबार, असार २५, २०८३
