काठमाडौँ । नेपाल मौसम विज्ञान विभागअन्तर्गत मौसम पूर्वानुमान महाशाखाले जारी गरेको मौसम पूर्वानुमान बुलेटिनअनुसार बिहीबारदेखि शनिबारसम्म कोशी, मधेश, बागमती, गण्डकी र लुम्बिनी प्रदेशका केही स्थानमा मेघगर्जन र चट्याङसहित मध्यम वर्षा तथा हिमाली र पहाडी भूभागका केही स्थानमा भारी वर्षा र हिमपातको सम्भावना छ।
महाशाखाका अनुसार हाल देशभर आंशिकदेखि सामान्य बदली रहेको छ। साथै, बंगालको खाडीमा विकसित चक्रवात ‘मोन्था’को समेत प्रभाव पर्ने देखिएको छ। बुधबार देशभर सामान्यतया बदली रहने पूर्वानुमान गरिएको छ।
कोशी प्रदेशको हिमाली भूभाग र बागमती, गण्डकी, लुम्बिनी, कर्णाली तथा सुदूरपश्चिम प्रदेशका केही स्थानमा हल्कादेखि मध्यम हिमपातको सम्भावना छ। मधेश प्रदेशसहित कोशी, बागमती, गण्डकी र लुम्बिनी प्रदेशका पहाडी तथा तराई भूभागका एक–दुई स्थानमा मध्यम वर्षा हुन सक्ने महाशाखाले जनाएको छ।
बिहीबार दिउँसो कोशी, मधेश, बागमती र गण्डकी प्रदेशलगायत कर्णाली तथा सुदूरपश्चिम प्रदेशका हिमाली भूभागमा सामान्यतया बदली रहनेछ।
देशका अधिकांश स्थानमा बादल लाग्ने र केही स्थानमा हल्कादेखि मध्यम हिमपात हुने सम्भावना छ। कोशी, मधेश, बागमती, गण्डकी र लुम्बिनी प्रदेशका केही स्थानमा मेघगर्जन र चट्याङसहित मध्यम वर्षा हुन सक्नेछ।
बिहीबार राति पनि कोशी, मधेश, बागमती, गण्डकी र लुम्बिनी प्रदेशका साथै कर्णाली र सुदूरपश्चिम प्रदेशका हिमाली भूभागमा बदली रहने पूर्वानुमान छ। देशका केही स्थानमा हल्कादेखि मध्यम हिमपात तथा वर्षा हुन सक्ने महाशाखाले जनाएको छ।
शुक्रबार र शनिबार पनि देशका अधिकांश स्थानमा आंशिकदेखि सामान्य बदली रहनेछ। कोशी, मधेश, बागमती, गण्डकी र लुम्बिनी प्रदेशका पहाडी तथा हिमाली भूभागका केही स्थानमा वर्षा र हिमपातको सम्भावना रहेको छ।
कर्णाली र सुदूरपश्चिम प्रदेशका हिमाली तथा पहाडी भूभागमा समेत मौसम बदली भई केही स्थानमा वर्षा वा हिमपात हुन सक्ने अनुमान छ।
महाशाखाले हिमाली तथा उच्च पहाडी क्षेत्रमा यात्रा गर्ने सर्वसाधारण, पर्यटक र पर्वतारोहीलाई मौसमको अवस्था बुझेर मात्र यात्रा गर्न आग्रह गरेको छ।
भारी वर्षा तथा हिमपात हुन सक्ने स्थानमा सतर्कता अपनाउन, सम्भावित जोखिमबाट बच्न र मौसमसम्बन्धी अद्यावधिक सूचना नियमित रूपमा लिन पनि महाशाखाले अनुरोध गरेको छ।
प्रकाशित मिति: बिहीबार, कात्तिक १२, २०८३
