सिन्धुली । सिन्धुलीको फिक्कल गाउँपालिकापा ६ स्थित नागथानबाट एउटा सुमो जिप सुनकोशी नदीमा खस्दा ३ जनाको मृत्यु भएको छ भने ३ जना वेपत्ता भएका छन् ।
काठमाडौँबाट खोटाङतर्फ जाँदै गरेको टाटा सुमो गति अनियन्त्रित भई सुनकोशी नदीमा खसेको प्रहरीले जनाएको छ । यात्रा गरिरहेका १० जना मध्ये ३ जनाको घटनास्थलमा नै मृत्यु भएको सशस्त्र प्रहरी बल नेपालले जनाएको छ ।
३ जना बेपत्ताको खोजी भइरहेको र ४ जनाको उद्धार गरी उपचारको लागि अस्पताल पठाइएको सशस्त्र प्रहरी बल नेपालका सहप्रवक्ता डीएसपी शैलेन्द्र थापाले जानकारी दिनुभयो ।
उहाँका अनुसार आज बिहान २ बजेर ४० मिनेटमा दुर्घटना भएको थियो ।
को १ ज २९७६ नम्बरको टाटा सुमो अनियन्त्रित भई सडकबाट करिब ५ सय मिटर तल सुनकोशी नदीमा खसेको हो ।
सशस्त्र प्रहरी बल नेपाल विपद् व्यवस्थापन बेस खुर्कोटबाट गोताखोरसहित १० जनाको टोली र इलाका प्रहरी कार्यालय खुर्कोटबाट संयुक्त टोली घटनास्थलमा खोजी तथा उद्धारमा खटिएको छ ।
घाइतेहरुमा खोटाङ दिक्तेल नगरपालिका ३ का सम्झना राई, सीवनी राई, वडा नम्बर १ का अङ्कित विक र चलाक ओखलढुड्गा वस्ने अषिस विक रहेको पनि प्रहरीले जनाएको छ ।
प्रकाशित मिति: आइतबार, कात्तिक १, २०८३
