नवलपरासी । नवलपरासी (पूर्व) को बिनयी त्रिवेणी गाउँपालिका २ चौसठ्ठीमोड स्थित पूर्व-पश्चिम राजमार्गमा आज बिहान भएको दुर्घटनामा ५ जनाको मृत्यु भएको छ ।
नेपालगञ्जबाट काठमाण्डौँतर्फ आउँदै गरेको प्रदेश-३-०१-००६ ख १५५३ नम्वरको यात्रुवाहक बस अनियन्त्रित भएर दुर्घटना भएको प्रहरीले जनाएको छ ।
दुर्घटनामा १३ जना घाइते भएको र उनीहरूको उद्धारपछि उपचार भइरहेको सशस्त्र प्रहरी बल नेपालका सहप्रवक्ता डीएसपी शैलेन्द्र थापाले जानकारी दिनुभयो ।
मृत्यु हुनेमा बाँके कोहलपुर ३ बस्ने वर्ष ३२ का दिपेन्द्र केसी, बाँके कोहलपुर १० बस्ने वर्ष ५५ का एकेन्द्रराज रेग्मी, नेपालगंज ७ बस्ने वर्ष २२ का कृष कनौजिया, बाजुरा स्वामीकार्तिकका वर्ष ६५ का नरेन्द्रराज गिरी र नामथर वतन नखुलेका अन्दाजी ४२ वर्षका एक पुरुष रहेको सहप्रवक्ता थापाले जानकारी दिनुभयो ।
मृतक सबैको शव मध्यबिन्दु प्रादेशिक अस्पताल डण्डामा राखिएको छ भने बसमा सवार यात्रुहरुमध्ये २ जना सकुशल रहेको पनि प्रहरीले जनाएको छ ।
प्रकाशित मिति: शनिबार, असोज १७, २०८३
