मुगुको ताल्चामा जिप दुर्घटना हुँदा तीन जनाको मृत्यु, दुई घाइते

साझा खबर

खड्क सुनार आइतबार, कात्तिक २९, २०८३

मुगु । मुगुको छायानाथ रारा नगरपालिका–७ टोप्लास्थित ताल्चा–रारा कच्ची सडकखण्डमा हाइलक्स जिप दुर्घटना हुँदा तीन जनाको मृत्यु भएको छ भने दुई जना घाइते भएका छन्।

आज साँझ पौने ५ बजे सुर्खेतबाट रारातर्फ जाँदै गरेको बा १७ च १८६४ नम्बरको हाइलक्स जिप सडकबाट करिब ६ सय मिटर तल खसेर दुर्घटनामा परेको हो।

जिप ललितपुर महानगरपालिका–१५ निवासी ५८ वर्षीय कञ्चन थापाले चलाएको र दुर्घटनामा जिपमा सवार काठमाडौँ कलङ्की निवासी ५० वर्षीय विजय बस्नेत, काठमाडौँ निवासी ५४ वर्षीय रमेश बिडारी र ५० वर्षीय पूर्णकुमार थापाको मृत्यु भएको प्रहरीको भनाइ छ।

प्रहरीका अनुसार तीनै जनालाई उद्धार गरी जिल्ला अस्पताल मुगु पुर्‍याएकोमा चिकित्सकले मृत घोषणा गरेका थिए।

दुर्घटनामा चालक थापा र ललितपुर महानगरपालिका–१५ निवासी ५४ वर्षीया अन्जु थापा घाइते हुनुभएको छ ।

दुवै जनाको अवस्था मध्यम रहेको र जिल्ला अस्पताल मुगुमा उपचार भइरहेको छ।

दुर्घटनाको खबर प्राप्त हुनासाथ जिल्ला प्रहरी कार्यालय मुगुबाट प्रहरी नायव उपरीक्षक रविराज थपलियाको कमान्डमा १० जना र ताल्चास्थित प्रहरी सुरक्षा गार्डबाट प्रहरी नायव निरीक्षक डम्बरबहादुर अधिकारीको कमान्डमा ७ जना गरी १७ जनाको प्रहरी टोली घटनास्थलमा खटिएको थियो।

प्रकाशित मिति: आइतबार, कात्तिक २९, २०८३

खड्क सुनार आइतबार, कात्तिक २९, २०८३

प्रतिक्रिया दिनुहोस्