सल्यान । सल्यानको छत्रेश्वरी गाउँपालिका–२, दहखोलाकी ५१ वर्षीया नन्दा घर्तीलाई ज्वरो, टाउको दुख्ने, शरीर दुख्ने लक्षण देखापरेपछि श्रीनगरमा रहेको निजी अस्पतालमा परीक्षण गर्दा स्क्रबटाइफस सङ्क्रमण पुष्टि भयो ।
स्वास्थ्य अवस्था थप जटिल भएपछि उहाँलाई उपचारका लागि नेपालगञ्ज लगिएको थियो । उपचारका क्रममा नेपालगन्जमा मृत्यु भएपछि अहिले परिवार शोकमा छ ।
काजक्रियाको काम चल्दै गर्दा परिवारका सदस्यमा समयमा नै उपचारका लागि अस्पतालमा पुर्याउन नसकिएकोमा पछुतो महसुस भइरहेको नन्दाका छोरी तुल्सा रावतले बताउनुभयो ।
स्वास्थ्य जाँचमा सहभागी हुँदै सर्वसाधारण। नन्दालगायत ९ जनाको झन्डै तीन महिनायता स्क्रबटाइफसका कारण मृत्यु भएपछी अहिले सल्यानका गाउँघरमा त्रासको अवस्था छ । ज्वरो, टाउको दुख्ने, शरीर दुख्ने र अत्यधिक कमजोरी हुने समस्या लिएर स्वास्थ्य संस्थामा पुग्ने बिरामीको संख्या पनि बढेको बागचौर नगरपालिका ११ का मिना खड्काले बताउनुभयो ।
विज्ञहरूका अनुसार स्क्रबटाइफस सङ्क्रमित मुसामा पाइने सूक्ष्म माइट अर्थात् चिगरको टोकाइबाट मानिसमा सर्छ ।
खेतबारी, घाँस तथा झाडीमा काम गर्दा पूरा बाहुला भएको कपडा र पाइन्ट लगाउन तथा सम्भव भएसम्म किरा भगाउने स्प्रे प्रयोग गर्न सुझाव दिनुहुन्छ जनस्वास्थ्य अधिकृत ताराप्रसाद रिजाल ।
४ हजारभन्दा बढीको किटद्वारा परीक्षण गर्दा दार्मा गाउँपालिकामा सङ्क्रमितको सङ्ख्या २ सय ६२, कुमाख गाउँपालिकामा ७६, छत्रेश्वरी गाउँपालिकामा २८, बागचौर नगरपालिकामा १ सय ८०, कपुरकोटमा ५४, बन्गाड कुपिण्डे नगरपालिकामा ८, कालीमाटीमा २ र जिल्ला अस्पताल सल्यानमा ५० जनाभन्दा बढीमा सङ्क्रमण पुष्टी भएको छ ।
दार्मा गाउँपालिकाका स्वास्थ्य शाखा प्रमुख यज्ञ बहादुर बस्नेतले यो रोग लागेमा के कसरी उपचार गर्ने भन्ने बारेमा स्थानीय मेडिकल सञ्चालकलाई पनि जानकारी दिने गरिएको बताउनुभयो ।
सङ्क्रमण र मृत्युदर बढेपछि किटजन्य रोग नियन्त्रण महाशाखा टेकु र प्रदेश स्वास्थ्य सेवा निर्देशनालय सुर्खेतबाट विशेषज्ञ टोली सल्यान आएको छ ।
टोलीले दार्मा र कुमाखलगायतका क्षेत्रमा पुगेर सङ्क्रमणको अवस्था, सम्भावित कारण तथा जोखिम क्षेत्रबारे अध्ययन गरिरहेको किटजन्य रोग नियन्त्रण महाशाखा प्रमुख हेमराज पाण्डेको भनाइ छ ।
स्वास्थ्य सेवा कार्यालय सल्यानका अनुसार जिल्लाभर हालसम्म ७ सय जना भन्दा बढीमा स्क्रब टाइफस संक्रमण पुष्टि भइसकेको छ ।
प्रकाशित मिति: बुधबार, असोज २८, २०८३
