दाङ । दाङको देउखुरी क्षेत्रका किसानको काट्नका लागि ठिक्क पारेको धानबालीमा निरन्तरको पानी र हावाहुरीका कारण ठूलो क्षति पुगेको छ ।
वर्ष दिनका लागि खाने धान खेतमै भिजेपछि किसानलाई अब के खाने ? भन्ने चिन्ताले सताएको छ ।
बर्सेनि यस्तो समस्या भोग्दै आएका किसानले डुवानको समस्या समाधान गर्न र कृषी बिमाको व्यवस्था गरीदिन सरोकारवालासँग आग्रह गरेका छन् ।
सिँचाइको सुविधा भएका कारण असारमै धानखेती गरेका देउखुरीका किसान धान भित्राउन ठिक्क परेको समयमा परेको लगातारको पानीले क्षति पुर्याएको गढवा गाउँपालिका– ५ चैनपुरका किसान विष्णु बहादुर महराले बताउनुभयो ।
ठूलो पानी र हावाहुरीका कारण धान सबै खेतमै ढलेकोे छ भने खेत जलमग्न भएको किसानको गुनासो छ ।
वर्षदिनलाई खाने धान हावाहुरी र वर्षाका कारण खेतमै ढलेपछी उत्पादन घट्नुका साथै खानका लागि समस्या पर्ने चिन्ताले सताएको स्थानीय बसन्त बहादुर खड्काको भनाइ छ ।
देउखुरी क्षेत्रका लमही, राप्ती, गढवा र गढवा गाँउपालिकामा अधिकांश किसानको खेतमा धान पाकेर पहेँलपुर छ ।
किसानले यो वर्ष मात्रै होइन, बर्सेनि यस्ता खालका समस्यहरु भोग्दै आइरहेका कारण स्थानीय सरकार वा अरु कुनै निकायजे बीमाको व्यवस्था गरिदिनुपर्ने बताउनुहुन्छ गढवा गाउँपालिका– ५ का किसान सलिम खान ।
लगातार करिब ४ दिन परेको पानी र हावाहुरीका कारण धान बालीमा भएको क्षतिको बिवरण सङ्कलनको काम तत्कालै सुरु गर्ने आह्वासन स्थानीय जनप्रतिनिधिले दिएका छन् ।
के कति राहतको व्यवस्था गर्न सकिन्छ भन्ने बारेमा अध्ययन भइरहेको पालिकाहरूको भनाइ छ ।
प्रकाशित मिति: बुधबार, असोज १४, २०८३
