काठमाडौँ । रसुवाको भोटेकोशी हुँदै त्रिशुली र नारायणी नदिमा आएको बाढीबाट प्रभावितहरुको खोज तथा उद्धार र विपद् व्यवस्थापनका लागि सशस्त्र प्रहरी बल,नेपालबाट क्षतिग्रस्त संरचना खोज तथा उद्धार (सीएसएसआर) टोलीसहित १ हजारभन्दा धेरैल सशस्त्र प्रहरीको जनशक्ति परिचालन भएको छ ।
बाढी प्रभावित क्षेत्रमा विपद् प्रतिकार्य वेश स्थापना गरी उपचार, उद्धार र आपूर्तिको काममा तालिम प्राप्त जनशक्ति हिजोदेखि नै परिचालन गरिएको सशस्त्र प्रहरी बलका सहप्रवक्ता शैलेन्द्र थापाले सीआईएनसँग बताउनुभयो ।
परिचालित टोलीले विभिन्न संरचना तथा जलविद्युत परियोजनाहरु लगायतका प्रभावित स्थानहरुमा सम्पर्कविहीन भएकाहरुको खोज तथा उद्धार कार्यलाई निरन्तरता दिँदै आईरहेको जनाइएको छ ।
सशस्त्र प्रहरी बल नेपालबाट तालिम प्राप्त कुकुर र ६ वटा ड्रोन पनि परिचालन गरिएको छ । टोलीले १२ स्थानबाट ९८ वटा शव, ३० जना घाईते तथा ७३ जनाको सकुशल उद्धार गरेको छ ।
बाढीमा परी घाइते भएकाहरूका लागि तत्काल प्राथमिक उपचारको व्यवस्था मिलाउन सशस्त्र प्रहरी बल नेपालको चिकित्सकसहितको टोलीले नुवाकोट जिल्लामा स्वास्थ्य शिविर सञ्चालन गरेको पनि सहप्रवक्ता थापाले जानकारी दिनुभयो ।
उहाँका अनुसार बाढीमा परेकाहरुको तत्काल उपचारको लागि नेपाल एपीएफ अस्पताल बलम्बुमा १ सय वटा वेडहरु समेत खाली राखिएको छ ।
सशस्त्र प्रहरी बल, नेपाल विपद् व्यवस्थापन तालिम शिक्षालय कुरिनटारमा १ सय वटा वेड क्षमतासहितको डीआरएस कन्टेनरहरू बाढी प्रभावित क्षेत्रहरुमा तत्काल पुर्याउने कार्यसमेत भईरहेको जनाइएको छ ।
प्रकाशित मिति: बिहीबार, भदौ ११, २०८३
