रेडियो मुक्तिनाथ, पाल्पा ।
तिहार र पाल्पाली ढाका टोपी एक अर्काको पर्याय जस्तै भएको छ ।
तिहार पर्वको अवसरमा दिदी बहिनीले दाजुभाइलाई ढाकाका सरसामान उपहार दिने चलनले गर्दा ढाकाको व्यापार अन्य समयमा भन्दा तिहारमा बढी हुने गर्छ ।
तिहारको समयमा तानसेनका ढाका पसलहरुमा दाजुभाईको लागि टोपी, आस्कोट, टाई, किन्नेहरुको भिड हुने गर्छ ।
तिहारको टीकाको दिनमा दिदी बहिनीले दाजु भाइलाई ढाका टोपी दिने चलन छ भने दाजुभाइले पनि दिदि बहिनीलाई ढाकाकै पछ्यौरा, साडी, कुर्तासुरुवाल, ब्याग, लगायत उपहार दिने गर्छन् ।
तिहारको समयमा पाल्पाली ढाकाको माग अरु समयमा भन्दा बढि हुने गरेको स्थानीय डासुराम पन्थ बताउनुहुन्छ ।
पाल्पा घुम्न आउने आन्तरीक र बाह्य पर्यटकले ढाकाका सामग्रीलाई उपहार र मायाको चिनोको रुपमा लैजाने चलन छ ।
दशैंदेखि तिहारसम्म नै ढाकाका सरसमान बढि विक्री हुने गरेको छ । दशैंदेखि तिहारसम्मको अवधिमा एकलाख देखि ५ लाखसम्म ढाकाको व्यापार हुने गरेको व्यापारीहरुको भनाइ छ ।
तानसेनमा मात्रै हाल १० वटा ठूला खालका ढाका उद्योग छन् । जिल्लाभरी नै घरेलु तानबाट ढाका बुन्नेको संख्या दिनहु बढिरहेको छ । पाल्पामा एउटा ढाका टोपीको मुल्य एकसय रुपैयाँदेखी २५ सय रुपैयाँसम्म छ ।
अहिलेसम्म घरेलु तथा साना उद्योग कार्यालय पाल्पामा २४ वटा पाल्पाली ढाका कपडा उद्योग दर्ता छन् जसमध्ये १९ वटा ढाका कपडा उद्योग क्रियाशील अवस्थामा छन् ।
मासिक ५ हजारदेखि २५ हजारसम्म कमाइ हुने ढाका बुन्ने कामदारहरु बताउँछन् ।
गत बर्ष १० करोडको हाराहारीमा कारोबार भएको पाल्पाली ढाका यसबर्ष १२ करोडसम्मको कारोबार हुने ढाका उद्योगीहरुको अनुमान छ ।
२०१५ सालमा एउटा तानबाट शुरु भएको पाल्पाली ढाका अहिले देशकै गौरवको रुपमा परिचित छ ।
प्रकाशित मिति: मंगलबार, कात्तिक १२, २०७६, ०९:३३
