रसुवा र नुवाकोटका बाढी प्रभावित विद्यालयमा अस्थायी सिकाइ केन्द्र स्थापना

शिक्षा

लिलप्रकाश चन्द सोमबार, असोज ५, २०८३

काठमाडौँ । रसुवा र नुवाकोटका बाढी प्रभावित क्षेत्रमा शैक्षिक गतिविधिलाई निरन्तरता दिन अस्थायी सिकाइ केन्द्र (टीएलसी) तथा कक्षाकोठाहरू स्थापना गरिएको छ ।

प्रभावित बालबालिकाको पढाइलाई सहज बनाउन विभिन्न शैक्षिक सामग्री वितरण गर्नुका साथै विद्यालयमा सरसफाइको कामसमेत गरिएको छ ।

प्राधिकरणको विवरणअनुसार रसुवा र नुवाकोटमा गरी कुल ३५ वटा अस्थायी सिकाइ केन्द्र तथा कक्षाकोठा स्थापना गरिएका छन् ।

बाढी प्रभावित विद्यार्थीलाई आवश्यक शैक्षिक सामग्री उपलब्ध गराउन २० थान प्रारम्भिक बालविकास किट र ३६ थान विद्यालय/शिक्षक किट वितरण गरिएको छ ।

विद्यार्थी किटबाट प्रभावित तथा निजी विद्यालयमा अध्ययनरत विद्यार्थीसमेत गरी कुल २,३४९ जना विद्यार्थी लाभान्वित भएका छन् ।

बाढीका कारण प्रभावित विद्यालयहरूमा पुनः पठनपाठनको वातावरण बनाउन भग्नावशेष हटाउने, सरसफाइको कामलाई तीव्रता दिइएको छ ।
बाढी प्रभावितमध्ये ६ वटा विद्यालय पुनः सञ्चालनमा आइसकेका छन् ।

बाढी प्रभावित क्षेत्रमा आवश्यकताको मूल्यांकनसहित ३९ वटा विद्यालयका लागि मनोसामाजिक परामर्श टोली परिचालन गरिएको पनि प्राधिकरणले जनाएको छ ।

रसुवा तथा नुवाकोटका १६ वटा विद्यालयमा फोकल शिक्षकहरू तोकिएका छन् ।

प्रकाशित मिति: सोमबार, असोज ५, २०८३

लिलप्रकाश चन्द सोमबार, असोज ५, २०८३