काठमाडौँ । संसदीय समितिबाट पारित भएको शिक्षा विधेयकमा असन्तुष्टि जनाउँदै नेपाल शिक्षक महासङ्घले आज काठमाडौँमा पत्रकार सम्मेलन गरी आन्दोलनका कार्यक्रम सार्वजनिक गरेको छ ।
आन्दोलनको पहिलो चरणको कार्यक्रम अन्तर्गत यही भदौ ९ गते प्रधानमन्त्री, शिक्षामन्त्री र राजनीतिक दलका प्रमुख सचेतकलाई ध्यानाकर्षण पत्र बुझाइने, भदौ ११ देखि २० गतेसम्म सङ्घीय राजधानीमा सबै राजनीतिक पार्टीका कार्यालयमा ध्यानाकर्षण पत्र बुझाउने र २ घण्टा धर्ना दिने अध्यक्ष लक्ष्मिकोशोर सुवेदीले जानकारी दिनुभयो ।
भदौ १३ गते सबै पालिकामा र भदौ १५ गते सबै जिल्लाका समन्वय एकाइमा ध्यानाकर्षण पत्र बुझाउने र २ घण्टा धर्ना दिने निर्णय भएको उहाँको भनाइ छ ।
भदौ २१ गते दोस्रो चरणका आन्दोलनका कार्यक्रम सार्वजनिक गरिने पनि महासङ्घले जनाएको छ ।
प्रकाशित मिति: शुक्रबार, भदौ ६, २०८२
