काठमाडौँ । रसुवाको भोटेकोशी बाढीपछि होल्डिङ सेन्टरमा बसेकामध्ये ८० दशम्लव ६ प्रतिशतले सरकारद्वारा सहयोग प्राप्त अस्थायी आवासमा बस्ने इच्छा व्यक्त गरेका छन् ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणले भदौ २३ देखि ३१ गतेसम्म गरिएको सर्वेक्षणमा होल्डिङ सेन्टरमा रहेका २ हजार २७ बाढी प्रभावित घरधुरीहरूको अस्थायी आवास आवश्यकताको मूल्याङ्कन गरिएको थियो ।
प्राधिकरणका अनुसार नुवाकोटमा १ हजार ५ सय ५७, रसुवामा ३ सय ९७, धादिङमा ७२ र चितवनमा एक घरधुरी रहेका छन्।
सर्वेक्षण गरिएका घरधुरीहरूमध्ये ६६ दशम्लव ९ प्रतिशत बाढी प्रभावितले सरकारी सहयोगमा बहाल (भाडा) को आवास व्यवस्थापन गर्न इच्छुक रहेको जनाएका छन्।
२५ दशम्लव ३ प्रतिशत घरधुरीले मात्र अस्थायी आवासका लागि आफूसँग आफ्नै जग्गा उपलब्ध रहेको बताएका छन् भने ८ दशम्लव शून्य प्रतिशतले बाढी प्रभावित क्षेत्रबाहिर वैकल्पिक घर रहेको बताएका छन्।
सर्वेक्षण गरिएका कुल १ हजार ७ सय ७६ घरधुरीले आफ्नो घरमा पूर्ण क्षति पुगेको, २ सय १८ ले आंशिक क्षति भएको र ३३ घरधुरीले सडक पहुँच अवरुद्ध भएको जनाएका छन्।
सर्वेक्षण गरिएकामध्ये ३ देखि ६ जना सदस्य रहेका घरधुरीहरू ७४ दशम्लव ६ प्रतिशत रहेका थिए भने ९ जना वा सोभन्दा बढी सदस्य रहेका घरधुरी ५ दशम्लव १ प्रतिशत रहेका थिए ।
प्रकाशित मिति: आइतबार, असोज ४, २०८३
