काठमाण्डौं । ओमानमा जारी ५ राष्ट्रबीचको पाँच देशीय टी–ट्वान्टी क्रिकेट सिरिजमा नेपालले लगातार दोस्रो जित निकालेको छ ।
आज भएको खेलमा नेदरल्याण्डलाई ४ विकेटले पराजित गर्दै नेपालले लगातार दोस्रो जित निकालेको हो । अल अम्रेट क्रिकेट मैदानमा नेदरल्याण्डले दिएको १ सय ३० रनको लक्ष्य नेपालले १९ ओभर ५ बलमा ६ विकेट गुमाएर पुरा गरेको हो ।
नेपालको जितमा करण केसीले १४ बलमा १ चौका र ३ छक्कासहित अविजित ३१ रन बनाउनुभयो । यस्तै कप्तान पारस खड्काले सर्वाधिक ३३ रन बनाउनुभयो भने बिनोद भण्डारीले २६ रन जोड्नुभयो यसअघि टस हारेर पहिले ब्याटिङ गरेको नेदरल्याण्डले २० ओभरमा ८ विकेट गुमाएर १ सय ३० रन बनाएको थियो ।
नेपालका सन्दीप लामिछानेले ४ ओभरमा मात्र २० रन खर्चेर ४ विकेट हात पार्नुभयो । यस्तै करण केसीले ३ विकेट र ललित नारायण राजवंशीले १ विकेट लिनुभयो । जितसँगै नेपालले २ खेलबाट ४ अंक जोडेको छ । नेपाल सिरिजको दोस्रो स्थानमा छ । पहिलो खेलमा नेपालले हङकङलाई ४ विकेटले हराएको थियो । अब नेपालले पर्सि बुधबार आयरल्याण्डसँग र अन्तिम खेलमा नेपालले ओमानसँग बिहिबार गते खेल्नेछ ।
प्रकाशित मिति: सोमबार, असोज २०, २०७६, १६:११
