धनगढी । सुदूरपश्चिम प्रदेशका मुख्यमन्त्री कमलबहादुर शाहले प्रदेशका महिला, बालबालिका, वृद्धवृद्धाका लागि पोषण किट वितरण योजनामा सहयोग गर्न सरोकारवाला निकायलाई अनुरोध गर्नुभएको छ ।
वर्डभिजन इन्टरनेशनल नेपालको आयोजनामा आज धनगढीमा भएको "पोषण सुधारका लागि इनफ" अभियानको शुभारम्भ कार्यक्रममा मुख्यमन्त्री शाहले वर्ल्डभिजनले प्रशंसनीय काम गरेको उल्लेख गर्दै प्रदेश सरकारले आगामी दिनमा पोषण सुधार अभियानमा थप समन्वय र सहकार्य गर्ने प्रतिबद्धता जनाउनुभयो ।
आफूले मुख्यमन्त्रीको रुपमा विगतमा नीति तथा कार्यक्रम बनाउँदा लक्षित वर्ग (महिला, बालबालिका तथा वृद्धवृद्धा) का लागि पोषण किट बनाएर दिने योजना बनाएको स्मरण गर्दै आगामी दिनमा उक्त योजना कार्यान्वयनका लागि गैरसकारी निकायबाट पनि सहयोग पाउने विश्वास उहाँले व्यक्त गर्नुभयो ।
राज्यले बनाउने योजना, कार्यक्रममा त्रुटि रहेको स्वीकार गर्दै मुख्यमन्त्री शाहले भन्नुभयो"समाज रुपान्तरणका लागि गैरसरकारी निकायको भूमिका महत्वपूर्ण छ । तर तपाईँहरूले पनि अझ समन्वय राम्रोसँग गर्नुपर्ने देख्छु । सरकारसँग मिलेर जाँदा लक्षमा पुग्न सजिलो हुने विश्वास मेरो छ।"
कार्यक्रममा सामाजिक विकास मन्त्री मेघराज खड्काले पोषण सुधारका लागि रैथाने बालीको संरक्षण र यसप्रतिको समाजको बुझाइ अझ सकारात्मक बनाउनुपर्ने धारणा राख्नुभयो ।
कार्यक्रममा विचार राख्नुहुँदै सामाजिक विकास मन्त्री मेघराज खड्का । कोदोलगायतका रैथाने बाली अरुलाई बेचेर चामल खाँदा सभ्य भइन्छ भन्ने मान्यता गलत भएके उल्लेख गर्दै उहाँले इनफ अभियान कार्यान्वयनका लागि मन्त्रालयको तर्फबाट सहयोग रहने प्रतिबद्धता जनाउनुभयो । बाजुरालगायतका कुपोषणका कारण बढी प्रभावित जिल्लामा पनि कार्यक्रम सञ्चालन गर्न उहाँले वर्ल्डभिजनसँग अनुरोध गर्नुभयो ।
सुदूरपश्चम प्रदेशका कृषिमन्त्री वीरबहादुर थापाले प्रदेशभरमा रहेको हानिकारक प्रथा, परम्पराको अन्त्य र पोषणको अवस्थामा सुधारका लागि सामाजिक विकास मन्त्रालय र कृषि मन्त्रालयबीच आगामी दिनमा अझ धेरै समन्वय गर्ने बताउनुभयो ।
इनफ अभियानको कार्यान्वयनमा आफ्नो मन्त्रालयको तर्फबाट सहयोग रहने प्रतिबद्धता उहाँले व्यक्त गर्नुभयो ।
आन्तरिक मामिला मन्त्री हिरा सार्कीले इनफ अभियान घोषणा हुनु प्रदेशका लागि खुसीको कुरा रहेको टिप्पणी गर्दै यसलाई कार्यान्वयनका लागि मन्त्रालयको तर्फबाट भरपुर सहयोग हुने प्रतिबद्धता व्यक्त गर्नुभयो ।
कार्यक्रममा कृषि विकास निर्देशनालय दिपायलका कृषि निर्देशक खगेन्द्र प्रसाद शर्मा, पत्रकार अर्जुन शाह, स्वास्थ्य निर्देशनालयका तथ्याङ्क अधिकृत धर्मानन्द गिरीले पोषणको अवस्था, सरकारको योजना र सुधारका लागि चाल्नुपर्ने कदमको बारेमा प्रस्तुती राख्नुभएको थियो ।
वर्ल्डभिजन इन्टरनेशनलका एडभोकेसी म्यानेजर श्याम घिमिरेले वर्ल्डभिजनले नेपालमा सञ्चालन गरेको कार्यक्रम, प्रभाव र आगामी योजना तथा इनफ अभियानका बारेमा जानकारी गराउनुभएको थियो ।
प्रकाशित मिति: बिहीबार, असोज ३, २०८१
