काठमाडौँ । हिजो छुटेका बालबालिकालाई आज पनि ‘भिटामिन ‘ए’ क्याप्सुल र जुकाको औषधि खुवाइँदैछ।
राष्ट्रिय भिटामिन ‘ए’ कार्यक्रम अन्तर्गत सरकारले हिजो र आज देशभर भिटामिन ए क्याप्सुल र जुकाको औषधि खुवाउने अभियान चलाएको हो ।
६ महिनादेखि ५ वर्ष मुनिका बालबालिकालाई अभियानमा सहभागी गराउन परिवार कल्याण महाशाखाका निर्देशक डा मदनकुमार उपाध्यायले सीआईएनमार्फत सबै अभिभावकलाई अनुरोध गर्नुभयो ।
उहाँका अनुसार अभियानको बेलामा छुटेका बालबालिकालाई नजिकको स्वास्थ्य संस्थामार्फत पनि भिटामिन ए र जुकाको औषधि खुवाउन सकिनेछ ।
नेपालमा भिटामिन ‘ए’ क्याप्सुल र जुकाको औषधि खुवाउने कार्यक्रम हरेक वर्षमा २ पटक सञ्चाल हुने गरेको छ ।
कात्तिक २ र ३ गते तथा वैशाख ६ र ७ गते कार्यक्रम सञ्चालन गरिन्छ ।
यस वर्ष भने तिहार परेकाले कात्तिक २ र ३ गतेको कार्यक्रम आज र भोलिका लागि तय गरिएको स्वास्थ्य मन्त्रालयले जनाएको छ ।
सरकारले सबै स्थानीय तहमा ५ वर्ष मुनिका २८ लाख बालबालिकालाई भिटामिन ‘ए’ खुवाउने र करिव ३० लाख बालबालिकालाई जुकाको औषधि खुवाउने लक्ष्य राखेको छ ।
अभियानमा ५२ हजार महिला स्वास्थ्य स्वयं सेविका र १५ हजार स्वास्थ्यकर्मी परिचालन गरिएको पनि स्वास्थ्य तथा जनसङ्ख्या मन्त्रालयले जनाएको छ ।
प्रकाशित मिति: शुक्रबार, कात्तिक २१, २०८२
