काठमाडौँ । नेपाल रेडक्रस सोसाइटीले वीरगञ्जमा फैलिएको हैजा महामारी रोकथाम तथा नियन्त्रणका लागि प्रतिकार्य सुरू गरेको छ ।
नेपाल रेडक्रस सोसाइटी पर्सा जिल्ला शाखामार्फत प्रभावित समुदायका घरधुरीसम्म पुगी झाडापखाला तथा सम्भावित हैजाबाट बच्ने उपायहरूसहित सरसफाइ तथा स्वच्छता प्रवद्र्धन, खानेपान्ी शुद्धिकरण, हातधुने अभ्यास सहजीकरण र विरामीलाई स्वास्थ्य केन्द्रसम्म लैजान सहयोग गर्ने उद्देश्यले ३० जना महामारी नियन्त्रण स्वयंसेवकहरूलाई अभिमुखिकरण गरी परिचालन गरिएको रेडक्रसले जनाएको छ।
स्थानीयस्तरमा समन्वय गरी स्वयंसेवकमार्फत जीवनजल प्याकेट सरसफाइ सामग्री र खानेपानी शुद्धिकरण गर्ने विधिसहित क्लोरिन पनि उपलब्ध गराइएको छ ।
स्वास्थ्य तथा जनसङ्ख्या मन्त्रालयको महामारी तथा रोग नियन्त्रण महाशाखामार्फत ३ सय प्याकेट जीवनजल सम्भावित हैजा नियन्त्रणका लागि उपचार गरिरहेका अस्पतालहरूलाई हस्तान्तरण गरिएको पनि रेडक्रसले जानकारी दिएको छ ।
सम्भावित हैजा नियन्त्रणका लागि तीनै तहका सरकारी निकाय तथा सम्बद्ध सरोकारवाला निकायहरूसँग समन्वय गर्दै सहयोग पुर्याइरहेको छ ।
पर्सा जिल्लामा देखापरेको हैजाका केस बढ्दो रूपमा रहेको हुनाले सुख्खा सङ्कट प्रभावित जिल्लामा आपत्कालीन खानेपानी तथा सरसफाइका लागि रेडक्रस तथा रेडक्रिसेन्ट सोसाइटीहरूको अन्तर्राष्ट्रिय महासङ्घको आपत्कालीन विपद् कोषबाट सहयोग परिचालन गरी विगत १ महिनादेखि सञ्चालित खडेरी सम्बन्धी प्रतिकार्यका गतिविधिहरूमा पनि हात धुने अभ्यास सहित साबुन वितरण, आपत्कालीन शौचालय निर्माण र सरसफाई तथा स्वच्छताका गतिविधिहरू स्थानीय सरकार एवम् सरोकारवालाहरूसँंगको समन्वयमा तदारुकताकासाथ सुचारू भइरहेको जनाइएको छ ।
प्रकाशित मिति: बुधबार, भदौ ११, २०८२
