काठमाडाैँ । अबको भविष्य दिगो विकासको लागि शिक्षा भन्ने विषयवस्तुमा केन्द्रित रहेको पाँचौँ एक्का राष्ट्रिय विद्यालय क्लब सम्मेलन सम्पन्न भएको छ ।
शिविरमा विद्यालय क्लबलाई आत्मनिर्भर र दिगो बनाउने, जलवायु परिवर्तन, बालबालिकाको अधिकार, विद्यालयको वातावरण, पानी, स्वास्थ्य, सरसफाइ सम्बन्धी ज्ञान, विद्यालय क्लबहरूबिचमा गतिविधिको जानकारी आदानप्रदानलगायत गतिविधि सञ्चालन गरिएको आयोजक वातावरण संरक्षण शिविर (एक्का नेपाल)ले जनाएको छ ।
काभ्रेको धुलिखेलमा आयोजित शिविरमा कार्यक्रममा काठमाडौँ, ललितपुर, काभ्रे, दोलखा, चितवन, रुपन्देही धनकुटा, झापा र मोरङ गरी ९ जिल्लाका साथै थाइल्यान्ड र ताइवानका १४७ जना विद्यार्थी, शिक्षक, विद्यालय व्यवस्थापन समितिका सदस्य लगायत सहभागी रहेको एक्का नेपालले जनाएको छ ।
यो अवसरमा ज्ञान बजार कार्यक्रम अन्तर्गत उत्कृष्ट ६ वटा प्रस्तावलाई २५ हजार रुपैयाँका दरले रकम प्रदान गरिएको थियो । यस्तै चित्रकला र भिडियो प्रतियोगिता पनि सञ्चालन गरिएको थियो ।
प्रकाशित मिति: आइतबार, जेठ २७, २०८१, १८:०१
