काठमाडौँ । जनतालाई संसद र सांसदसँग जोड्दै कानुन निर्माणमा उनीहरूको अर्थपूर्ण सहभागिता बढाउँदै लैजाने उद्धेश्यले देशभरका सामुदायिक रेडियोहरूको साझा ञ्जाल, सामुदायिक सूचना नेटवर्क (सीआईएन) ले हेलो सांसद कार्यक्रम अझ बृहत रुपमा प्रसारण सुरु गरेको छ ।
बनेका कानुनको कार्यान्वयनको अवस्था र नयाँ कानुन बनाउँदा जनताको सहभागिताको विषयमा केन्द्रीत हुने रेडियो कार्यक्रम हेलो सांसद यूएनडीपी संसद सहयोग परियोजनासँगको सहकार्यमा सामुदायिक रेडियो प्रसारक सङ्घ अकोराब नेपालद्वारा सञ्चालित सीआईएनले आजदेखि उत्पादन तथा प्रसारण सुरु गरेको हो ।
सङ्घीय ससदका सभामुख देवराज घिमिरेले हेलो सांसद कार्यक्रम अझ व्यवस्थित रूपमा प्रसारण सुरु भएकोमा शुभकामना दिदै कार्यक्रमले जनताको सवाललाई सङ्कलन गरेर संसदसम्म पुर्याउन महत्वपूर्ण भूमिका खेल्ने विश्वास व्यक्त गर्नुभयो ।
जनतालाई संसद र सांसदसम्म जोड्न मात्रै नभइ बन्दै गरेका कानुनका बारेमा सुझाव लिन र बनिसकेका कानुन के कसरी लागु भएका छन् भन्ने बारेमा जानकारी लिनदिनका लागि पनि रेडियो कार्यक्रम हेलो सांसदले पुलको भूमिका खेल्नुपर्ने उहाँको भनाइ छ ।
रेडियो कार्यक्रम हेलो सांसदमा उठ्ने विषय आवश्यक परेमा सङ्घीय संसद र मातहतका विषयगत समितिमा छलफल गर्न सकिने उहाँले बताउनुभयो ।
राष्ट्रिय सभाका अध्यक्ष नारायणप्रसाद दाहालले आफू सीआईएनको पनि नियमित स्रोता रहेको उल्लेख गर्दै कार्यक्रम हेलो सांसदले आफ्नो विश्वास बढाउँदै सत्यतथ्यमा आधारित भएर संसदका कामकारबाहीका बारेमा जनतामा जानकारी पुर्याउने विश्वास व्यक्त गर्नुभयो ।
कतिपय सञ्चारमाध्यमले विषयलाई अतिरञ्जित गरेर विषयवस्तु प्रकाशन तथा प्रसारण गर्ने गरेको उल्लेख गर्दै अध्यक्ष दाहालले लामो समयको अनुभव र क्षमताका आधारमा सीआईएनले विषय प्रस्तुत गर्नुपर्ने धारणा राख्नुभयो ।
अध्यक्ष दाहालले संविधानसभाको गठनदेखि नै सीआईएनले तल्लो तहका जनताको आवाजलाई बानेश्वरसम्म जोड्ने काम गरेको बताउदै अझैँ पनि दुरदराजका जनताको प्रश्न सदनसम्म ल्याउन हेलो सांसद कार्यक्रमलाई प्रभावकारी बनाउनु पर्ने बताउनुभयो ।
कार्यक्रम हेलो सांसदको पहिलो अङ्कमा सभामुख घिमिरे र अध्यक्ष दाहालसँगको विशेष कुराकानी प्रसारण गरिएको छ भने रेडियोले उठाउनुपर्ने विषयका बारेमा सातै प्रदेशका सभामुख तथा उपसभामुखको विचार पनि प्रसारण गरेको छ ।
कोशी प्रदेशका सभामुख अम्बरबहादुर बिष्टले प्रदेशसभालाई बलियो बनाउनको लागि सञ्चारमाध्यमले केन्द्रमाझैँ सक्रियतापूर्वक काम गर्नुपर्ने बताउनुभयो ।
मधेस प्रदेशका सभामुख रामचन्द्र मण्डलले कार्यक्रम हेलो सांसदले जनतालाई सांसद र सांसदलाई जनतासँग प्रभावकारी रुपमा जोड्ने अपेक्षा गरेको बताउनुभयो ।
गण्डकी प्रदेशका सभामुख कृष्णप्रसाद धितालले प्रदेश सभाको बारेमा सही र तथ्यपर जानकारी जनतामाझ पुराउने कामलाई निरन्तरता दिनुपर्ने बताउनुभयो ।
बागमती प्रदेशका सभामुख भुवन कुमार पाठकले हेलो सांसदको आफू नियमित स्रोता भएको जानकारी गराउँदै भविष्यमा पनि अझ प्रभावकारी होस् भन्ने शुभकामना दिनुभयो । लुम्बिनी प्रदेशका सभामुख तुलाराम घर्ती मगरले हेलो सांसद कार्यक्रमले कानुन निर्माणलाई सहजिकरण गर्ने बताउनुभयो ।
कर्णाली प्रदेशका सभामुख नन्दा गुरुङले कार्यक्रम हेलो सांसद अझ बृहत र व्यवस्थित रुपमा सञ्चालन हुन लागेकोमा खुसी व्यक्त गर्नुभयो ।
सुदूरपश्चिम प्रदेश सभाका उपसभामुख कोइली देवी चौधरीले सरकारलाई उत्तरदायी बनाउन पनि हेलो सांसदले सहयोग गर्नुपर्ने बताउनुभयो ।
यूएनडीपी संसद सहयोग परियोजनाका राष्ट्रिय परियोजना व्यवस्थापक दिलादत्त पन्तले लोकतन्त्रमा जनता, संसद र सांसदबीचको संवादले शङ्का हटाउन सहयोग गर्ने भएकाले अकोराब र सीआईएनसँग रेडियो तथा डिजिटल सामग्री उत्पादनका लागि सहकार्य गरिएको बताउनुभयो ।
संसदिय व्यवस्थालाई पारदर्शिता, सहभागितामुलक वनाउन र जिम्मेवार स्वामित्व लिन सक्ने बनाउने उद्देश्यले कार्यक्रम हेलो सांसदलाई संवादको साझा चौतारी बनाउने लक्ष राखिएको बताउनुभयो ।
सीआईएनले करिब १० वर्षदेखि हेलो सांसद कार्यक्रमलाई निरन्तरता दिदै आएको छ । कार्यक्रम हेलो सांसद सीआईएन मार्फत देशभरिका विभिन्न सामुदायिक रेडियोबाट प्रसारण हुन्छ भने सीआईएनको फेसबुक पेज सीआईएनखबर, वेबसाइट सीआईएनखबर डटकम, युट्युब च्यानल सीआईएन र टिकटक सीआईएन साझा खबरमा पनि सुन्न सकिन्छ ।
कार्यक्रममा सातै प्रदेशका प्रदेश सभाले दोस्रो कार्यकालमा कानुन निर्माणमा गरिरहेको कामकारबाही, हेलो सांसद कार्यक्रमका बारेमा प्रदेश सभामुखहरूको अपेक्षा, सङ्घीय संसदले गरिरहेको कामकारबाहीको पछिल्लो अवस्था र उपलब्धिका बारेमा साप्ताहिक रूपमा जानकारी दिइने सीआईएन म्यानेजर दीपक आचार्यले बताउनुभयो ।
प्रकाशित मिति: शुक्रबार, जेठ १०, २०८२
