जनपुर । कृषिमा लागेका युवालाई प्रोत्साहन र जलवायु परिवर्तनको असरबाट बच्ने उपायका बारेमा जानकारी दिनका लागि सञ्चारमाध्यमको भूमिका महत्वपूर्ण हुने सरोकारवालाले बताएका छन् ।
उनीहरूले जलवायु परिवर्तनको असर, यसबाट बच्ने उपाय, उद्यमशीलताका बारेमा अरुलाई जानकारी दिनुभन्दा अघि पत्रकारले पनि पूर्ण रूपमा उक्त विषयमा थाहा पाउनु राम्रो हुने बताएका छन् ।
एफएओसँगको सहकार्यमा सामुदायिक रेडियो प्रसारक सङ्घ (अकोराब) नेपालको आयोजनामा जनकपुरमा भएको 'जलवायु परिवर्तन, कृषि प्रणाली र कृषिमा युवा सहभागिताका लागि सञ्चारमाध्यमको भूमिका' विषयक अन्तरक्रियामा सहभागीले कृषिका बारेमा पत्रकारले समेटेको विषय र आगामी दिनमा ध्यान दिनुपर्ने पक्षका बारेमा जानकारी गराएका थिए ।
अन्तरक्रिया कार्यक्रममा प्रस्तुति राख्दै मधेस प्रदेशको भूमि व्यवस्था कृषि तथा सहकारी मन्त्रालयका प्रवक्ता, वरिष्ठ पशु विकास अधिकृत डा सरोज चौधरीले तीनै तहका सरकाले किसानका लागि बनाएका योजना र कार्यक्रमका बारेमा जानकारी दिनका लागि सञ्चारमाध्यमको भूमिका प्रभावकारी हुने बताउनुभयो ।
उहाँले प्रदेश सरकारले मधेश प्रदेशमा सञ्चालन गरेका कार्यक्रम र कार्यान्वयनका लागि जिम्मेवार निकायका बारेमा जानकारी गराउनुका साथै किसानसम्म जानकारी र सूचना पुर्याउनका लागि पत्रकारसँग समन्वय गरेको र आगामी दिनमा अझ सुधार गर्दै अघि बढ्ने प्रतिबद्धता जनाउनुभयो ।
उहाँका अनुसार मधेश प्रदेशमा सरकारले सञ्चालन गरेका कार्यक्रमका बारेमा सामाजिक सञ्जाल, वेबसाइटलगायतका माध्यमबाट पनि जानकारी गराउने गरिएको छ ।
कार्यक्रममा कृषि निर्देशनालयका वरिष्ठ बागबानी अधिकृत प्रदीप कुमार यादवले निर्देशनालय मातहतका निकायले सञ्चालन गरेका कार्यक्रमका बारेमा जानकारी गराउनुभयो ।
प्रदेश सरकारले जलवायु परिवर्तनको असरका बारेमा जानकारी दिन र यो असरबाट बच्ने उपायका बारेमा कार्यक्रम बनाएको भए पनि यो पर्याप्त नभएको उहाँको भनाइ छ ।
यादवले किसानहरूमा आफ्नो लगि सरकारले बनाएको योजना तथा कार्यक्रम बारे जानकारी लिनेक्रम बढेको भए पनि उनीहरूसम्म खेतीकिसानीको बारेमा सरकारले बनाएका योजना बारे जानकारी दिने महत्वपूर्ण भूमिका सञ्चारमाध्यमको पनि हो भन्नुभयो ।
कार्यक्रममा एफएओका रोजिता मिश्रले एफएओले खाद्य सुरक्षा, जलवायु परिवर्तनको असर न्यूनिकरण, कृषिमा युवा सहभागितालगायत बारेमा सञ्चालन गरेको कार्यक्रमका बारेमा जानकारी गराउनुभयो ।
मधेश प्रदेश क्षेत्रमा सञ्चालित परियोजनाको बारेमा जानकारी दिँदै उहाँले ती परियोजनाले पारेका सकारात्मक प्रभावपछि नै कतिपय जिल्ला र गाउँमा स्थानीय समुदायले नै अपनत्वसहित निरन्तरता दिएको बताउनुभयो ।
"हामीले सरकारसँगको समन्वयमा कार्यक्रम सञ्चालन गरिरहेका छौँ । ती कार्यक्रमको बारेमा लक्षित वर्गसम्म जानकारी पुर्याउनका लागि पनि सञ्चारमाध्यमको भूमिका महत्वपूर्ण हुन्छ । त्यही आवश्यकता पूरा गर्ने सन्दर्भमा मधेश प्रदेशका सञ्चारकर्मीको उपस्थितिमा छलफल चलाइएको हो।" मिश्रले भन्नुभयो ।
नेपाल पत्रकार महासङ्घ धनुषाका अध्यक्ष पुरन साहले जिल्लामा रहेका पत्रकारहरूले सबै विषयमा रिपोर्टिङ गर्नुपरेका कारण पनि कृषिको विषयमा पर्याप्त रिपोर्टिङ हुन नसकेको स्वीकार गर्नुभयो ।
महासङ्घकै अग्रसरतामा केही समयभित्रै कृषिको क्षेत्रमा कलम चलाउने पत्रकारहरूको सङ्गठन बनाउने प्रतिबद्धता जनाउँदै उहाँले अकोराबले मधेश प्रदेशका पत्रकारलाई एक ठाउँमा राखेर विगतदेखि हालसम्मको कृषि रिपोर्टिङको अवस्थाका बारेमा समीक्षा गर्दै भविष्यको योजना बनाउन प्रेरित गरेकोमा धन्यवाद दिनुभयो ।
सामुदायिक रेडियो प्रसारक सङ्घ अकोराब मधेश प्रदेशका उपाध्यक्ष रीना आलेले कृषि क्षेत्रका अवसर तथा चुनौतीका बारेमा रिपोर्टिङका लागि पत्रकारसँग निरन्तर संवाद कार्यक्रमको आयोजना गर्नुपर्नेमा जोड दिनुभयो ।
-1760434442.jpeg)
अकोराबका वरिष्ठ उपाध्यक्ष गोबिन्द देवकोटाले समुदायमा कृषिको क्षेत्रमा पनि सकारात्मक गतिविधि तथा अभ्यास रहेको उल्लेख गर्दै यसमा पत्रकार तथा सञ्चार माधम्यको विशेष ध्यान जानुपर्ने धारणा राख्नुभयो।
सामुदायिक रेडियो पत्रकारिता अन्तरगत रेडियो तथा रेडियोकर्मीले यसमा केही सफल अभ्यास गरे पनि पर्याप्त नरहेकोमा जोड दिँदै वरिष्ठ उपाध्यक्ष देबकोटाले जलवायु परिवर्तनको असर न्यूनिकरण, कृषिमा युवाको सहभागिता, सफल अभ्यासका बारेमा अरुलाई जानकारी दिएर प्रेरणा जगाउन पनि पत्रकारले कमल चलाउनुपर्नेमा जोड दिनुभयो ।
अन्तरक्रियामा पत्रकारहरूले आफूले गरिरहेको कृषि पत्रकारिताको अभ्यास र चुनौतीका बारेमा अनुभव सुनाएका थिए।
प्रकाशित मिति: मंगलबार, असोज २८, २०८२
