सल्यान । नेपालमा अदुवा र बेसारका तीन–तीन नयाँ जातहरू पहिचान भएका छन्।
नेपाल कृषि अनुसन्धान परिषद् अन्तर्गत सल्यानको कपुरकोटस्थित राष्ट्रिय अदुवाबाली अनुसन्धान कार्यक्रमले अदुवाका जेडआई १३०२, जेडआई १३०३ र जेडआई १०२७ जात तथा बेसारका सीआई १२१३, सीआई ०२०५ र सीआई ०२०७ जातलाई पहिचान गरेको हो।
कार्यक्रम संयोजक डाक्टर घनश्याम भण्डारीका अनुसार आगामी वर्ष अदुवाको जेडआई १३०३ र बेसारको सीआई १२१३ जात उत्पादनका लागि सिफारिस गरिने तयारी गरिएको छ।
उहाँका अनुसार सिफारिस प्रक्रिया लामो हुने भएकाले यस वर्ष प्रस्ताव तयार पारिँदैछ।
पहिचान गरिएका जातहरू रोग प्रतिरोधात्मक, उत्पादन क्षमतायुक्त र बासना तथा तेलको मात्रा अधिक हुने विशेषतायुक्त छन्।
यसअघि कपुरकोट अदुवा–१ र कपुरकोट अदुवा–२ गरी दुई वटा जात मात्र सिफारिस भएका थिए।कार्यक्रमले अदुवा र हलेदोका ७२ र १०३ स्थानीय तथा रैथाने जातहरू संरक्षण गरिरहेको जानकारी दिइएको छ।
अनुसन्धान कार्यक्रमले मकै, गहुँ, कोदो, मसुरो, तोरी, बदामलगायत अन्य बालीमा पनि अनुसन्धान गर्दै आएको छ।
नेपालमा हाल २३ हजार ८२९ हेक्टरमा अदुवा र ९ हजार २२ हेक्टरमा हलेदो खेती हुँदै आएको छ।
प्रमुख अदुवा उत्पादक जिल्लामा सल्यान, इलाम, पाल्पा, झापा र रोल्पा पर्दछन् भने हलेदो उत्पादनमा सप्तरी, कैलाली, सिन्धुली, उदयपुर, कास्की र सुर्खेत प्रमुख छन्।
प्रकाशित मिति: आइतबार, वैशाख २८, २०८२
