काभ्रे । संयुक्त राष्ट्र सङ्घको खाद्य तथा कृषि सङ्गठन (एफएओ) का पदाधिकारीलाई काभ्रेको मण्डनदेउपुर नगरपालिका ३ खस्रे गुरुङगाउँमा स्वागत गर्नुका साथै स्थानीय किसानले लगाएको खेतीबाली उत्पादन प्रदर्शन गरिएको छ ।
मण्डनदेउपुर नगरपालिकाको आयोजनामा भएको कार्यक्रममा एफएओका दक्षिण तथा त्रिदेशीय सहयोग महाशाखाका निर्देशक एवं प्रधान कार्यालयका उपनिर्देशक ह्वा याङ र भ्रमणमामा गएको प्रतिनिधिमण्डललाई स्वागत गरिएको हो ।
आयोजित सामुदायिक अन्तरक्रिया तथा स्वागत कार्यक्रममा मण्डनदेउपुरको खस्रे गुरुङ लगायतका समुदायले दिगो ग्रामीण विकासमा आफूले हासिल गरेका उपलब्धिहरू प्रदर्शन पनि गरे भने स्थानीय नवप्रवर्तनका योजनाका बारेमा सुनाउनुका साथै उपलब्धिहरू पनि प्रस्तुत गरेका थिए ।
समुदायद्वारा सञ्चालित होमस्टे, नमूना घरहरू र स्थानीय किसानहरूको कोदोखेतीको पनि भ्रमण टोलीले अवलोकन गरेको छ ।
मण्डनदेउपुर नगरपालिका चीन अन्तर्राष्ट्रिय विकास सहयोग एजेन्सी (सीआईडीसीए) को विश्वव्यापी विकास तथा दक्षिण सहयोग कोषको समर्थनमा भर्खरै सुरु भएको "नेपालमा कृषि-खाद्य प्रणाली सुदृढीकरण" परियोजनाका प्रमुख कार्यस्थलहरू मध्ये एक हो।
फोर बेटर्सको आधारमा निर्माण गरिएको यस पहलले जलवायु अनुकूलन क्षमता वृद्धि गर्ने, स्थानीय शासन र सेवा प्रवाहलाई सुदृढ बनाउने, डिजिटल कृषि नवप्रवर्तनलाई प्रवर्द्धन गर्ने र स्थानीय नागरिकका लागि बजारमुखी आर्थिक अवसरहरू सिर्जना गर्ने लक्ष्य राखेको छ।
गाउँमा देखिएको उल्लेखनीय प्रगतिबारे बोल्दै भुटान र नेपालका लागि एफएओका प्रतिनिधि केन शिमिजुले भन्नुभयो "राम्रो उत्पादन, राम्रो पोषण, राम्रो वातावरण र राम्रो जीवन अब केवल अवधारणा मात्र रहेका छैनन्। तिनीहरू तपाईंहरूको खेतबारी, घर, उद्यम र सामुदायिक पहलहरूमा उपलब्धि तथा नतिजामा पनि देखिन थालेका छन्।"
एफएओका दक्षिण तथा त्रिदेशीय सहयोग महाशाखाका निर्देशक एवं प्रधान कार्यालयका उपनिर्देशक ह्वा याङले दक्षिण-दक्षिण सहयोग कार्यक्रम एकता, आपसी सम्मान, सामूहिक सिकाइ र ग्लोबल साउथका देशहरूबीच व्यावहारिक समाधानहरूको आदानप्रदानमा आधारित रहेको उल्लेख गर्नुभयो ।
"यसको मूल भावना भनेको एकअर्काबाट सिक्नु र सफल अनुभवहरूलाई स्थानीय आवश्यकता तथा प्राथमिकताअनुसार अनुकूलन गर्नु हो।" याङले थप्नुभयो ।
स्थानीय होमस्टेको विस्तार र परम्परागत बालीको प्रवर्द्धनदेखि मौरीपालन र च्याउ उत्पादनको एकीकरणसम्म, गुरुङ गाउँ नेपालभरि समावेशी र जलवायु-अनुकूल ग्रामीण रूपान्तरणका लागि एउटा प्रेरणादायी सिकाइस्थलको रूपमा काम गरिरहेको छ।
प्रकाशित मिति: बुधबार, साउन ६, २०८३
