तेह्रथुम । तेह्रथुममा रासायनिक मल विषादीको अत्यधिक प्रयोगले स्वास्थ्य जोखिम बढ्दै गएपछि जिल्लाको लालीगुराँस नगरपालिकाले अर्गानिक कृषि प्रणालीको अभ्यासलाई तीव्रता दिएको छ ।
दिगो कृषितर्फ उन्मुख हुने रणनीति अवलम्बन गरिएको नगरपालिको भनाइ छ । नगरका नौवटै वडामा स्थानीय किसानको सक्रिय सहभागितासहित अर्गानिक खेती विस्तार भइरहेको नगरपालिकाले जनाएको छ ।
नगरप्रमुख अर्जुन माबोहाङका अनुसार रसायनयुक्त खाद्य पदार्थ उपयोग गर्दा मावन स्वास्थ्यमा गम्भीर असर पारिरहेको पृष्ठभूमिमा अर्गानिक कृषि अभियानलाई मुख्य कार्ययोजना बनाएर अघि बढाइएको हो ।
नगरपालिकाले सहभागितामूलक गुणस्तर निर्धारण प्रणाली कार्यविधि लागु गर्दै किसानलाई गुणस्तरीय उत्पादनतर्फ प्रोत्साहन बढाएको छ ।
अर्गानिक उत्पादनको ढुवानी सहज बनाउन नगरपालिका दुईवटा कृषि एम्बुलेन्स सञ्चालनमा ल्याउने तयारीमा छ, जसमध्ये एउटा एम्बुलेन्स पहिल्यै खरिद भइसकेको उपप्रमुख जमुना कार्की मगरले बतानुभयो ।
किसानलाई निस्शुल्क बिउविजन, टनेल, पाइप, हेलटेक तथा आवश्यक सामग्री वितरण गरी अर्गानिक खेतीतर्फ आकर्षित गरिएको कृषि शाखाले जनाएको छ । १–४ रोपनी जग्गामा अर्गानिक खेती गर्ने किसानलाई विशेष अनुदान उपलब्ध गराइएको छ ।
दर्ता भएका किसानलाई तालिम, प्राविधिक सहयोग तथा निरन्तर अनुगमन पालिकाले नै गरिरहेको छ ।
कृषि शाखा प्रमुख आर्यल लिम्बूका अनुसार अहिलेसम्म १२ सय ७५ जना किसान अर्गानिक कृषि सूचीकरणमा सहभागी भइसकेका छन् ।
प्रकाशित मिति: शुक्रबार, मंसिर १२, २०८२
