काठमाडौँ । कर्णाली प्रदेश सरकार, संसद र सांसदले युवाका सवाल सम्वोधनका लागि युवासँगै समन्वय र संवाद बढाउने प्रतिबद्धता जनाएका छन् ।
सामुदायिक रेडियो प्रसारक सङ्घ (अकोराब) नेपालले यूएनडीपी संसद सहयोग परियोजनासँगको सहकार्यमा सुर्खेतको वीरेन्द्रनगरमा आज गरेको सार्वजनिक सुनुवाइमा सामाजिक विकास मन्त्री घनश्याम भण्डारीले युवाका लागि बनाइएका योजना र बजेट पारदर्शी बनाउने प्रतिबद्धता जनाउनुभयो ।
प्रदेशलाई लागुऔषधमुक्त बनाउनका लागि लालटिन अभियान सुरु गरिएको जानकारी दिँदै उहाँले प्रदेशमा जन्मिने हरेक छोरीको बचतका लागि सुरु गरिएको ‘बैँक खाता छोरीको सुरक्षा जीवनभरिको’ कार्यक्रमलाई परिमार्जनसहित अघि बढाउने प्रतिबद्धता जनाउनुभयो ।
छोरीबुहारी छात्रवृत्ति कार्यक्रम, स्वरोजगार बनाउन सुरु गरिने तालिमबाट प्रदेशका युवाले लाभ लिन सक्ने उहाँको भनाइ छ ।
प्रदेश सभामा दोभासेको व्यवस्था नभएको बारेमा दृष्टिविहीन युवाहरुले राखेको प्रश्नको जवाफ दिँदै मन्त्री भण्डारीले यसै आर्थिक वर्षमा ६० जनालाई दोभासे तालिमको व्यवस्था गर्ने बताउनुभयो ।
कार्यक्रममा आर्थिक योजना तथा मामिला मन्त्री राजीवविक्रम शाहले युवाहरू कुनै राजनीतिक दलको कार्यकर्ताका रुपमा मात्रै नभएर उद्यमी, व्यवसायमा लागेर उत्प्रेरणा जगाउने काममा लाग्नुपर्ने बताउनुभयो ।
दक्षजनशक्ति उत्पादनका लागि मन्त्रालयले प्राविधिक क्षेत्रको विकासका लागि बजेटको व्यवस्था गरेकाले त्यसबाट लाभ लिन विश्वविद्यालयका विद्यार्थीहरुलाई अनुरोध गर्नुभयो ।
कर्णाली प्रदेश सभाका उपसभामुख यसोदा न्यौपानेले प्रदेश सभाको बैठक चलिरहँदा दोभासेको माध्यमबाट बहिरा व्यक्तिलाई जानकारी दिनका लागि आवश्यक व्यवस्था गर्न समन्वय र पहल गर्ने प्रतिबद्धता जनाउनुभयो ।
प्रदेश सभा सदस्य तुलसा मल्लले युवाहरुलाई संसद, संसदीय समितिमा अवलोकन भ्रमणको व्यवस्था अहिले रहेको जानकारी दिँदै उनीहरुले सिकेको सीपलाई उपयोग गर्नका लागि शिक्षण संस्था र संसदबीच नियमित संवाद हुनुपर्ने बताउनुभयो ।
मध्यपश्चिम विश्वविद्यालयका डिन, सहप्राध्यापक डा पूर्णमान श्रेष्ठले विश्वविद्यालयमा अध्ययनरत विद्यार्थीलाई प्रदेश सरकार र प्रदेश सभामा अभ्यास गर्ने प्रशिक्षार्थीको रुपमा उपयोग गर्न सकिने धारणा राख्नुभयो ।
उहाँको प्रस्तावमा मन्त्रीद्वय भण्डारी र शाहले आपसी संवादका आधारमा अघि बढ्ने प्रतिबद्धता जनाउनुभयो ।
प्रकाशित मिति: मंगलबार, साउन २७, २०८२
