काठमाडौँ । चीनतर्फ परेको ठूलो पानीका कारण आएको बाढीले रसुवा गोसाइकुण्ड गाउँपालिका २ टिमुरे स्थित विद्युतीय गाडी चार्जिङ स्टेसनमा राखिएका करिब ८ वटा गाडी बगाएको छ ।
बाढीका कारण भन्सार कार्यालय रसुवाको यार्डमा क्षति पुगेको छ भने ८/९ वटा लोड कन्टेनरका डिब्बा बगाएको सशिस्त्री प्रहरीका सहायक प्रवक्ता शैलेन्द्र थापाले जानकारी दिनुभयो ।
उहाँका अनुसार रसुवागढी हाइड्रोपावरको ड्याममा पनि बाढीले क्षति पुर्याएको छ । नम्बर २० गुल्म रसुवाबाट सशस्त्र प्रहरी नीरिक्षक रबिन्द्र दाहालको कमाण्डमा २१ जनाको टोली उद्धार सामाग्रीसहित खटिएको छ ।
टोली स्याफ्रुबेशीदेखि अगाडि सडक चर्केकाले जान नसक्ने अवस्थामा रहेकोले घटनास्थल पुग्न पैदल हिँडेको छ ।
रसुवा गोसाइँकुण्ड गाउँपालिका २ तातोपानी स्थित पासाङल्हामु राजमार्ग अन्तर्गत स्याफ्रुबेशी- रसुवागढी सडकखण्डमा भोटेकोशी नदीमा आएको बाढीले सडक पूर्ण कटान गरेको छ भने पहिरो झरी सडक अबरुद्ध रहेको सशस्त्र प्रहरी बलका सहायक प्रवक्ता थापाले जानकारी दिनुभयो ।
नेपाल-चीन जोड्ने मितेरीपुल बीच भागमा भाँचिएर बगाएको छ । टिमुरेस्थित भन्सार यार्डमा बाढी पसेका कारण ३/४ वटा मालबाहक कन्टेनरको डिब्बा बगाएको छ।
नदिमा पानीको बाहब धेरै बढ्दै गएकाले किनार क्षेत्रमा बसोबास गर्ने स्थानीय नागरिकहरुलाई सचेत रहन प्रहरीले अनुरोध गरेको छ । सशस्त्रको बीओपी टिमुरे रसुवाबाट सशस्त्र प्रहरी नीरिक्षक प्रकाश पाण्डेको कमाण्डमा २० जनाको टोली खटिएको जनाइएको छ ।
प्रकाशित मिति: मंगलबार, असार २४, २०८२
