काठमाडौँ । नेपाल १९ वर्षमुनिको विश्वकप क्रिकेटको दोस्रो चरणमा प्रवेश गरेको छ । समुह चरणको तेस्रो तथा अन्तिम खेलमा अफगानिस्तानलाई १ विकेटले हराउँदै नेपाल अर्को चरणमा प्रवेश गर्न सफल भएको हो । १४६ रनको मध्यम लक्ष्य भएपनि नेपाललाई लक्ष्य भेट्टाउन भने हम्मेहम्मे परेको थियो ।
नेपालले ४५ औँ ओभरमा ९ विकेट गुमाएर पूरा गरेको हो । नेपालका लागि कप्तान देब खनालले सर्वाधिक ५८ रनको योगदान गर्नुभयो । उहाँले ८९ बलमा ७ चाैका प्रहार गर्नुभएको थियो । यस्तै दीपक बोहोराले २७, आकाश त्रिपाठीले १६ र अर्जुन कुमालले १० रनको योगदान गर्नुभयो।
टस जितेर पहिले ब्याटिङ रोजेको अफगानिस्तानलाई नेपालले ४१ औँ ओभरमा १४५ रनमा अलआउट गरेको थियो । नेपालका आकाश चन्दले ५ विकेट लिनुभयो । ८ ओभरमा ३४ रन खर्चेर ५ विकेट लिनुभएका आकाश १९ बर्षमुनिको विश्वकपमा ५ विकेट लिने पहिलो नेपाली खेलाडी बन्नुभएको छ ।
अब नेपालले समुह ए बाट अर्काे चरणमा प्रवेश गरेका तीन टोलीसँग खेल्नेछ ।
प्रकाशित मिति: शुक्रबार, माघ १२, २०८०, १९:४८
