काठमाडौँ । सरकारको नेतृत्व गरिरहेको दल नेपाली काँगेसमा १३ भातृसङ्गठन तथा १८ वटा शुभेच्छुक संस्था छन् । तर ती सङ्घसङ्गठनले पार्टी जीवनलाई जीवन्त बनाउन कुनै भूमिका नखेलेको आरोप लाग्ने गरेको छ ।
माउ पार्टी काँग्रेसले पनि भ्रातृ सङ्घसङ्गठनलाई जनहितमा परिचालन गर्न सकेको छैन । पटकपटक महाधिवेशनको मिति परिवर्तन गरेको नेपाली काँग्रेसले पार्टीलाई नै विधान र नीति अनुसार लैजान सकेको छैन ।
जसले गर्दा भ्रातृसङ्गठनहरूको काम र उनीरूको बैधानिकतातर्फ पार्टीले चासो दिन भ्याएको छैन ।
पार्टीको गुटगत राजनीति र नेताको बचाउका लागि मात्र पार्टीले भ्रातृसङ्गठनलाई बुझ्ने गरेको नेपाल विद्यार्थी संघका नेता विकल राई बताउनुहुन्छ ।
नेताहरूले शक्ति देखाउन भ्रातृसङ्गठनलाई प्रयोग मात्र गरेको उहाँको बुझाइ छ ।
माउ पार्टी काँग्रेसले जस्तै हरु नेवि सङ्घ, तरुण दल, नेपाल महिला सङ्घ लगायतले पनि समयमै महाधिवेशन गर्न सकेका छैनन् ।
नेताहरूको पछाडि लाग्ने र स्वार्थको राजनीति गर्ने प्रवृति बढेको हुनाले भ्रातृसङ्गठनहरूले देश र नागरिकको सवालमा काम गर्न नसकेको स्वयम् नेताहरु स्वीकार्छन् ।
नेपाल तरुण दलका पूर्व महासचिव भुपेन्द्रजङ्ग शाहीले राम्रो काम गर्ने व्यक्तिलाई नेतृत्वमा पुग्ने अवसर नभएको हुनाले भ्रातृसङ्गठनहरू उदेद्धेश्यविहीन देखिएको बताउनुहुन्छ ।
भ्रातृसङ्गठनमा आफू निकट नेतृत्व ल्याउन हानथाप गर्ने पार्टीका नेताहरूले उनीहरूलाई रचनात्मक काम गर्न निर्देशन दिएको पाइँदैन । पाली काँग्रेसको सबैभन्दा ठूलो भ्रातृसङ्गठन नेपाल विद्यार्थी सङ्घ हो । तर विद्यार्थीको पक्षमा नेविसङ्घको आवाज बुलन्द भएको सुनिँदैन ।
समयमा महाधिवेशन हुन नसक्दा यस्तो अवस्था आएको नेपाली काँग्रेसका नेता गुरुराज घिमिरे बताउनुहुन्छ । नेपाली काँग्रेसका सहमहामन्त्री प्रकाशशरण महत भने भ्रातृसङ्गठनहरू आफ्नो संरचना अनुसार चलिरहेको दाबी गर्नुहुन्छ ।
महाधिवेशनपछि भ्रातृसङ्गठनको गतिविधि थप प्रभावकारी हुने उहाँको भनाइ छ ।
लाखौँ युवा कार्यकर्ता पार्टीको भ्रातृसङ्गठनमा लागेर राजनीति गरिरहेका छन् । तर उनीहरूको समय र विचारलाई देशको विकास र परिवर्तनमा भन्दा पनि समर्थनकर्ताको रुपमा पार्टीले प्रयोग गर्ने प्रवृति देखिएको राजनितिक विश्लेषकहरुको बुझाइ छ ।
राजनीतिक विश्लेषक पुरञ्जन आचार्य भ्रातृसङ्गठनले वर्गीय मुद्दा उठान नचाहेको हुनाले उनीहरू भूमिकाविहीन जस्तो भएको बताउनुभयो ।
पार्टीलाई बलियो बनाउन जनताको दुखसुखमा भ्रातृसङ्गठनको उपस्थिति महत्वपूणर् हुन्छ । तर भ्रातृसङ्गठन आफैंमा स्वतन्त्र छैनन् भने मूल पार्टीले सक्रिय पनि बनाउन सकेको छैन ।
प्रकाशित मिति: शुक्रबार, कात्तिक १२, २०७८
