काठमाडौँ । सार्वजनिक संस्थाहरू वा निकायहरूको सुदृढीकरणका लागि राजनीतिक दल र नेताहरू, प्राज्ञिक वर्ग, सञ्चारमाध्यम अनि नागरिक समाजले सामूहिक पहल लिन आवश्यक रहेको विज्ञहरूले सुझाव दिएका छन् ।
सामुदायिक रेडियो प्रसारक संघ (अकोराब) नेपालले आज ललितपुरमा आयोजना गरेको ‘बदलिँदो परिवेशः सार्वजनिक संस्था सुदृढीकरणका सवालहरू’ विषयक अन्तर्क्रिया कार्यक्रममा काठमाडौँ विश्वविद्यालयका प्राध्यापक डा उद्धव प्याकुरेलले सत्तामा रहँदा सुधारको पहल नगर्ने र प्रतिपक्षमा रहँदा सार्वजनिक संस्थाहरूप्रति कटाक्ष गर्ने परिपाटीले नागरिक तहमा सार्वजनिक संस्थाहरूप्रति निराशा बढाएको बताउनुभयो ।
काठमाडौँ विश्वविद्यालयका प्राध्यापक डा उद्धव प्याकुरेल ।
दलहरूभित्र लोकतान्त्रिक अभ्यास कमजोर हुँदा दलप्रतिको सार्वजनिक स्वामित्व कमजोर भएको र त्यसको प्रभाव अन्य संस्थाहरूमा पनि परेको उहाँको भनाइ छ ।
राष्ट्रिय योजना आयोगका पूर्व उपाध्यक्ष डा गोविन्दराज पोखरेलले नेपालमा नयाँनयाँ संस्था र निकायहरू थपिने क्रम बढेको तर ती निकायहरूको प्रभावकारिताको विषयमा कम ध्यान पुगेको बताउनुभयो ।
सार्वजनिक संस्था र निकायहरूको सवलीकरणको लागि काम गर्नुपर्ने दायित्व बोकेकाहरूले समेत ती निकायहरूको सुधारभन्दा नकारात्मक टिकाटिप्पणी गर्ने प्रचलन बढेकोले समाजमा नकारात्मक भाष्य सृजना भएको उहाँको विचार थियो ।
सेवा प्रवाहमा हुँदै आएको ढीलाइ र सार्वजनिक निकायले सेवा प्रवाह गर्दा सेवाग्रीलाई देखाउने व्यवहारले पनि सार्वजनिक संस्था वा निकायहरूमाथिको विश्वास र भरोसामा कमी आउने युवा अभियन्ता अर्जुन साहले बताउनुभयो ।
सार्वजनिक संस्थाहरूमाथिको जनभरोसा घट्नुको कारण ठूला विषयहरूमा नभइ सेवा प्रवाहका ससाना क्षेत्रमा सुधारबाट गर्दा भरोसा बढ्ने बताउँदै नागरिक समाजका प्रतिनिधी तथा बालबालिका शान्ति क्षेत्र अभियानका अध्यक्ष तिलोत्तम पौडेलले जनताले दिनदिनै सेवा लिनुपर्ने संस्थाहरूको सुशासन र कार्यसम्पादन सुधार गरेर सार्वजनिक निकायहरूमाथिको नागरिक विश्वास बढाउन सुझाव दिनुभयो ।
त्रिभुवन विश्वविद्यालय अन्तर्गत पुल्चोक इन्जिनियरिङ्ग क्याम्पसमा प्राध्यापनरत प्रकाशचन्द्र घिमिरेले सार्वजनिक संस्था र निकायहरूमा नागरिकको भरोसा बढाउनका लागि उपयुक्त नेतृत्व, नेतृत्वमा बसेकाहरूले जिम्मेवारी वहन गर्ने संस्कृति, चुस्त र प्रभावकारी विधि र जवाफदेहीताको संस्कृति बढाउन सुझाव दिनुभयो ।
गोरखाका सन्ध्या अछामीले सार्वजनिक संस्थालाई दिने सेवालाई डिजिटल बनाउनुपर्ने धारणा राख्नुभयो । पुल्चोक इन्जिनियरिङ क्याम्पसका स्ववीयू सभापति स्वयं श्रेष्ठले राजनीतिक रूपमा भागबण्डा गर्दा र त्यसैका आधारमा हुने नियुक्तिका कारण सार्वजनिक निकाय तथा संस्थाले विश्वास गुमाएको बताउनुभयो ।
आगामी दिनमा सुधार नगर्ने हो भने जनताको असन्तुष्टि अझ बढ्ने उहाँको भनाइ छ । राष्ट्रिय युवा परिषद्का बोर्ड सदस्य विनोद शाहीले सार्वजनिक निकायलाई दलरूको आडमा गिजेल्ने काम रोकेर ती निकायप्रति जनताको विश्वास बढाउन सकिने धारणा राख्नुभयो ।
प्रकाशित मिति: शुक्रबार, मंसिर १९, २०८२
