नेपाल विद्युत प्राधिकरणको केन्द्रीय प्रसारण लाइन १० वर्षे जनयुद्धको आधार भुमि थबाङमा पुगेको छ । आइतबार एक विशेष समारोहका बीच थबाङ गाउँपालिका १ र २ को गल्चोर, मराङ्थाना र ठुलो गाउँमा केन्द्रीय विद्युत प्रसारण लाइनको औपचारिक उद्घाटन गरिएको हो ।
उद्घाटन समारोहमा लुम्बिनी प्रदेशका सांसद दिपेन्द्रकुमार पुनले बटन थिचेर थबाङमा केन्द्रीय विद्युत आपूर्तिको शुभारम्भ गर्नुभएको थियो । कार्यक्रममा सम्बोधन गर्दै सांसद पुनले रोल्पामा करिब ३६ हजार घरमा विद्युत पुगेको बताउनुभयो ।
उहाँले भन्नुभयो, “रोल्पामा करिब ५२ हजारभन्दा बढी घरधुरी छन् । अहिले करिब ७५ प्रतिशत घरमा केन्द्रीय विद्युत पुगेको छ । २०६४ सालअघि विद्युतको पहुँच जम्मा १९ प्रतिशत मात्र थियो, अहिले आएर रोल्पा विद्युत क्षेत्रमा फड्को मारेको छ ।”
उहाँले थप्नुभयो, “रोल्पाबाट अर्थ मन्त्री हुँदा जिल्लामा धेरै बजेट ल्याउन सकियो, त्यसकै परिणामस्वरूप आज थबाङसम्म विद्युत पुगेको छ । हालसम्म रोल्पामा करिब १ सय ४ करोड रुपैयाँ बराबरको बजेट आइसकेको छ ।”
नेपाल विद्युत प्राधिकरण वितरण केन्द्र रोल्पाका कार्यालय प्रमुख अशेश्वर शाहले लामो समयको प्रयास र चुनौतीपछि थबाङमा केन्द्रीय विद्युत लाइन पु¥याउन सफल भएको बताउनुभयो ।
उहाँले भन्नुभयो, “विद्युत पुग्नु, बत्ती बाल्नु वा वाइफाई चलाउनु मात्र होइन, यसले जनजीवनमा नयाँ उज्यालो र आर्थिक रूपान्तरण ल्याउनेछ ।” शाहले थबाङ गाउँपालिकाभित्र बाँकी वडाहरूमा आगामी वर्षमा विद्युत विस्तार गर्ने दाबी गर्नुभयो ।
थबाङ गाउँपालिकाका अध्यक्ष ऋषिकेशव बुढा मगरले विद्युत थबाङमा पुगेकोमा स्थानीयवासी निकै उत्साहित भएको बताउनुभयो ।
केन्द्रीय विद्युत लाइन सञ्चालनमा आएसँगै थबाङ गाउँपालिका १ र २ का गल्चोर, मराङ्थाना र ठुलो गाउँका करिब २ सय ५० घरमा प्रत्यक्ष रूपमा विद्युत पुगेको छ । विद्युत पुगेपछि गाउँमा अध्ययन, सञ्चार, व्यवसाय र दैनिक जीवनका कामहरू सहज हुनेमा स्थानीयवासीले खुशी भएका छन् ।
प्रकाशित मिति: सोमबार, कात्तिक २४, २०८२
