काठमाडौँ । वीरगञ्जको सामुदायिक रेडियो नारायणी एफएमले २०औँ वार्षिकोत्सवका अवसरमा समाचार वाचन प्रतियोगिता गरेको छ ।
प्रतियोगितामा विभिन्न सञ्चारमाध्यममा कार्यरत पत्रकार र विद्यार्थी गरी ४२ जनाको सहभागिता रहेकोमा ठोरीका माधव तिमिल्सिना प्रथम, बारा सिमराकी लक्ष्मी खरेल द्वितीय र वीरगञ्जका सुर्यनारायण विक तृतीय हुनुभएको छ ।
तिमिल्सिनाले २० हजार, खरेलले १५ हजार, र विकले १० हजार रुपैयाँ नगद पुरस्कार पाउनुभयो ।
उत्कृष्ट प्रस्तुति दिएका सुरेश बिडारी, बिमला गुप्ता र आर्जु देवकोटालाई जनही ५ हजार रुपैयाँको सान्त्वना पुरस्कार प्रदान गरिएको छ ।प्रतिस्पर्धामा सहभागी विद्यार्थीमध्ये वीरगञ्ज पब्लिक कलेजका अमरप्रित कौर, वीरगञ्ज कलेजकी फारिदा खातुन र ज्ञानदा एकेडेमीकी प्राथना अधिकारीलाई प्रोत्साहनस्वरूप १५ सय रुपैयाँ र प्रमाणपत्र प्रदान गरिएको छ ।
प्रतियोगितामा क्रियाशील १४ जना पत्रकार तथा २८ जना विद्यार्थी प्रतिस्पर्धामा उत्रिएका थिए। विजेतालाई वीरगञ्ज महानगरका मेयर राजेशमान सिंहसँगै पर्साका प्रमुख जिल्ला अधिकारी भोला दाहाल र रेडियोका अध्यक्ष गोविन्द देवकोटाले संयुक्त रूपमा सम्मान गरेका थिए।
प्रतियोगिताको मूल्याङ्कन लक्ष्मण कार्की, प्रतिमा चौधरी र सन्तोष देउजाले गर्नुभभएको थियो ।
नयाँ पुस्तामा रेडियोप्रति आकर्षण बढाउने र समाचार वाचनमा संलग्न कर्मशील युवालाई प्रोत्साहन गर्ने उद्देश्यले प्रतियोगिता आयोजना गरिएको रेडियोका अध्यक्ष गोविन्द देवकोटाले जानकारी दिनुभयो ।
प्रकाशित मिति: सोमबार, मंसिर २२, २०८२
