मेल्लेख । अछामको मेल्लेख गाउँपालिकाले रोगमुक्त गाउँपालिका बनाउने अभियान सुरु गरेको छ । सबै नागरिकलाई स्वास्थ्यपहुँचमा ल्याउनेगरि विषेश कार्यक्रम सुरु गरेको छ । सबै नागरिको रोग पत्ता लगाउने र त्यसै अनुसारको उपचार सेवा दिनेगरि घरदैलोमा डाक्टर कार्यक्रम सुरु गरेको छ ।
पहिलो चरणमा दुईवडा वडामा स्वास्थ्य शिविर चलाएर रोग पत्ता लगाउने कार्यक्रम गरेको गाउँपालिकाका अध्यक्ष लोकबहादुर बोहराले जानकारी दिनुभयो । स्वास्थ्य परिक्षण गरेकाहरुको रोग अनुसार स्वास्थ्य जाँच कार्ड बनाइएको छ ।
त्यो कार्ड अनुसार गम्भिर प्रकृतिका विरामीलाई गाउँपालिकाले समेत सहयोग गरेर उपचारका लागि पठाउने, रोग अनुसार नियमित स्वास्थ्य शिविर चलाउने र स्वास्थ्य कार्ड हरेर नागरिकका घरमा नै पुगेर महिनाको एकपटक स्वास्थ्य जाँच गर्ने कार्यक्रम सुरु गरिएको अध्यक्ष बोहराले बताउनुभयो ।
गाउँपालिको वडा नम्बर १, २ र ६ मा भिडियो एक्सरेसहितको स्वास्थ्य शिवर गरेर उपचार सेवा समेत गाउँपालिकाले सुरु गरेको छ । वडानम्बर १ र २ ऋषिदहमा ५ सय ७६ जनाको स्वास्थ्य परिक्षण गरेकोमा ९९ प्रतिशतमा स्वास्थ्य समस्या देखिएको छ । ती मध्ये महिला ४ सय ७१ पुरुष १ सय ५ जना महिला थिए ।
सबैभन्दा धेरै ९२ जनामा पेटको समस्या देखिएको थियो । १२ महिलाको पाठ्यघर खसेको, ६ जनामा पथ्थरी भएको र ८५ जनामा मूत्रप्रणालीमा समस्या रहेको देखिएको स्वास्थ्य परिक्षणमा सहभागि डाक्टर विस्लप श्रेष्ठले जानकारी दिनुभयो ।
त्यस्तै गाउँपालिको वडा नम्बर ६ शोडषामा १ सय ८० जनाको स्वास्थ्य परिक्षण गरिएको छ । ती मध्ये १ सय ४६ जना महिला र ३४ जना पुरुष थिए । सबैभन्दा धेरै ४८ जनामा पेटजन्य समस्या देखिएको र २२ जना महिलाको पाठ्यघर खसेको पाइएको छ । १३ जनामा मूत्रप्रणालीमा समस्या देखिएको थियो । पाठ्यघर खसेका महिलाको निःशुल्क उपचार गर्नेगरि गाउँपालिकाले पहल गर्नेपनि बोहोराले जानकारी दिनुभयो ।
घरमा नागरिकता , नूनमा सहुलियत
गाउँपालिकाले नागरिकता विहीन नागरिलाई गाउँमा नै सिडियो लिएर घरमा नै नागरिकता दिएको छ । वडानम्बर १ मा ३ सय ६५ जनाले गाउँमा नै नागरिकता पाएका छन् । नागरिकता नभएका कारण जेष्ठ नागरिक भत्ता र अरु सामाजिक भत्तापाउन बन्चित हुनेहरुले राहात पाएको अध्यक्ष बोहराले जानकारी दिनुभयो ।
नागरिकलाई सर्वसुलभ रुपमा ५ सय क्वीन्टल आयोडिन युक्त नुन समेत गाउँमा नै पुगेर वितरण गरिएको छ । कृषि बालीमा देखिने समस्या र पशुचौपायामा लाग्ने रोगका विषयमा पनि गाउँमा नै कृषि प्राविधिक पुगेर उपचार सुरु गरिएको गाउँपालिकाले जनाएको छ । तीनवटा वडामा ४ हजार ८ सय २० पशुचौपायाको स्वास्थ्य परिक्षण गरिएको गाउँपालिकाले जनाएको छ ।
प्रकाशित मिति: सोमबार, फागुन ६, २०७५, ०८:५८:००
सीआईएन नेपालका सामुदायिक रेडियोहरुको नेटवर्क हो ।
