रामप्रकाश विक
जुम्ला । जुम्लाको सिजा क्षेत्रका मौलिक चाडपर्वहरूलाई राष्ट्रिय पात्रो (पञ्चाङ्ग) मा समावेश गर्ने प्रक्रिया अघि बढेको छ। नेपाल पञ्चाङ्ग निर्णायक विकास समिति र सिजा गाउँपालिकाबीच यस सम्बन्धमा सहमति भएको हो।
नेपाल पञ्चाङ्ग निर्णायक विकास समितिको केन्द्रीय कार्यालय, नारायणहिटी दरबार सङ्ग्रहालय परिसरमा भएको छलफलमा सिजा क्षेत्रका अनुपम सांस्कृतिक परम्पराहरूलाई राष्ट्रिय मान्यता दिने विषयमा सहमति जुटेको हो।
सिजा गाउँपालिकाका अध्यक्ष पूर्णप्रसाद धितालले विगत चार वर्षदेखि पालिकाले स्थानीय स्तरमा मौलिक पर्वहरूको संरक्षण र प्रवर्द्धन गर्दै आएको अभ्यासबारे समितिलाई जानकारी गराउनुभएको थियो।
छलफलपश्चात् सिजा क्षेत्रमा प्रचलित खस दिवस र तागा दिवस, साउन पूनि र भैलो, कोइरा दिवस र काफल दिवस, बारुवाँ लगायतका मौलिक पर्वहरूलाई आगामी नयाँ पात्रोमा समेट्ने सहमति भएको हो।
समितिका कार्यकारी निर्देशक लक्ष्मण पन्थीले सिजाली टोलीलाई स्वागत गर्दै खस सभ्यता र कर्णालीको मौलिकता जोगाउन समिति सकारात्मक रहेको बताउनुभयो।
सिजा गाउँपालिकाका अध्यक्ष धितालले यी पर्वहरू मनोरञ्जनका साधन मात्र नभई खस सभ्यताको पहिचान र सिजाली जनजीवनको अभिन्न अङ्ग भएको बताउनुभयो। राष्ट्रिय पात्रोमा समावेश हुनुले कर्णालीको पर्यटन प्रवर्द्धन र सांस्कृतिक गौरवलाई राष्ट्रिय तथा अन्तर्राष्ट्रिय स्तरसम्म चिनाउन सहयोग पुग्ने विश्वास व्यक्त गरिएको छ।
प्रकाशित मिति: सोमबार, पुस २१, २०८२
