काठमाडौँ । भक्तपुरको चाँगुनारायण नगरपालिकाले लैङ्गिक हिंसाविरुद्ध १६ दिने अभियानको अवसरमा पालिकाका सबै वडामा सचेतना कार्यक्रम गर्ने भएको छ ।
अभियान सुरु भएको अवसरमा आज नगरपालिकामा आयोजित विशेष कार्यक्रममा नगर प्रमुख जीवन खत्रीले हिंसाको विरुद्धमा उभिन र हिंसाका कारण र कानुनी व्यवस्थाका बारेमा जानकारी गराउनका लागि हरेक वडामा सचेतना जगाउने कार्यक्रम गर्न वडाका जनप्रतिनिधिलाई निर्देशन दिएको बताउनुभयो ।
लैङ्गिक हिंसाका विभिन्न स्वरुप समाजमा देखिन नछोडेको उल्लेख गर्दै नियन्त्रणका लागि जनप्रतिनिधि, सरकारी तथा गैरसरकारी निकाय एक भएर अघि बढ्नुपर्ने बताउनुभयो ।
लैङ्गिक हिंसा नहोस् भन्नका लागि नगरपालिकाले कार्यक्रम सञ्चालन गर्दै आएको जानकारी गराउँदै प्रमुख खत्रीले आगामी दिनमा अझ व्यवस्थित तरिकाले अघि बढ्ने प्रतिबद्धता जनाउनुभयो ।
कार्यक्रममा नगरपाकालिकाका कार्यकारी प्रमुख मोहनकुमार श्रेष्ठले लैङ्गिक हिंसाविरुद्धको १६ दिने अभियानको सुरुवात भएको सन्दर्भका बारेमा जानकारी गराउँदै वर्षभरि नै जनचेतनामूलक कार्यक्रम सञ्चलान हुँदा राम्रो हुने धारणा राख्नुभयो ।
सरोकारवाला निकायसँग समन्वय गरेर महिलालाई रोजगार बनाउने, क्षमता विकास र चेनता जगाउने खालका कार्यक्रम गरिने उहाँको भनाइ छ ।
नगरपालिकाको महिला बालबालिका तथा समाज कल्याण शाखा प्रमुख, वरिष्ठ महिला विकास अधिकृत निलाकुमारी घिमिरेले लैङ्गिक हिंसा अन्त्यका लागि चेतना जगाउनु नै सबैभन्दा महत्वपूर्ण रहेको बताउनुभयो ।
१६ दिनका लागि मात्रै नभएर वर्षभरि नै हिंसाविरुद्धका गतिविधि गरिँदा समाजमा सकारात्मक सन्देश जाने र हरेक वडामा सूचना तथा जानकारीमूलक कार्यक्रम सञ्चालनका लागि शाखाले सहजिकरण गरिरहेको जानकारी दिनुभयो ।
कार्यक्रममा सहभागी, जनप्रतिनिधि, कर्मचारी तथा सरोकारवाला निकायका प्रतिनिधिबीच लैङ्गिक हिंसाविरुद्धको १६ दिने अभियान, ययसको सुरुवात, समाजमा देखिने हिंसाका स्वरुप, महिला तथा बालिकालाई डिजिटल हिंसाको जोखिम र बच्ने उपायका बारेमा छलफल गरिएको थियो ।
"प्रविधिको सही प्रयोग गरौँ, लैङ्गिक हिंसा अन्त्य गरौँ" भन्ने नाराका साथ यो वर्ष लैङ्गिक हिंसाविरुद्धको १६ दिने अभियान आजदेखि मनाइँदैछ ।
प्रकाशित मिति: मंगलबार, मंसिर ९, २०८२
