माडी । ७ बुँदे घोषणापत्र जारी गर्दै बागमती प्रदेश सालक सम्मेलन आज सकिएको छ ।
बागमती प्रदेश सरकार, वन तथा वातावरण मन्त्रालयको आयोजना र डिभिजनल वन कार्यालय चितवनोको व्यवस्थापनमा भएको सम्मेलनले सालक संरक्षणका लागि ७ बुँदे प्रतिबद्धता व्यक्त गरेको छ ।
तामे सालक र कालो सालक नामक दुई वटा प्रजातिहरू बागमती प्रदेशभर भेटिएको उल्लेख गर्दै अवैध व्यापार र वासस्थान विनाशसमेतका कारण सालक सङ्कटापन्न अवस्थामा रहेको र यी जोखिमहरूलाई नियन्त्रण गर्दै सालक संरक्षण गर्नु हामी सबैको साझा दायित्व रहेको निष्कर्ष निकालएको डिभिजनल वन कार्यालय चितवनका प्रमुख विष्णुप्रसाद आचार्यले जानकारी दिनुभयो ।
उहाँका अनुसार सालक पाइने वन र संरक्षित क्षेत्रहरूमा संरक्षण तथा वासस्थान व्यवस्थापन, संरक्षण शिक्षा अभिवृद्धि लगायतका कार्यहरू सरोकारवाला निकायको पहलमा कार्यान्वयन गर्ने गराउने, चोरी सिकार तथा अवैध व्यापार नियन्त्रणका लागि तीन तहका सरकार, संरक्षण साझेदार सङ्घ संस्थाहरू, स्थानीय समुदायहरूको सहयोगमा सामुहिक पहल गर्ने प्रतिबद्धता जनाइएको छ ।
'नेपाल सरकारले तर्जुमा गरेको सालक संरक्षण कार्ययोजनाको प्रभावकारी कार्यान्वयन गर्न प्रदेशस्तरीय योजना बनाइ सोको लागी आवश्यक साधन स्रोत जुटाइ लागु गर्ने, स्थानीय समुदायको सहभागितामा राष्ट्रिय तथा अन्तरराष्ट्रिय सङ्घ संस्थाहरू, विश्व विद्यालय, तिनै तहका सरकार समेतको सहकार्यमा सालक संरक्षणका लागि आवश्यक अध्ययन अनुसन्धान अगाडि बढाउने घोषणापत्रमा उल्लेख छ ।
सालक संरक्षणका लागि स्थानीयको सक्रिय सहभागिता र अपनत्व हुने गरी संरक्षण कार्ययोजना निमार्ण तथा प्रभावकारी कार्यान्वयन गर्ने, अन्य सबै प्रदेश तथा राष्ट्रियस्तरमा सालक सम्मेलन गर्न बागमती प्रदेश सरकारमार्फत अनुरोध गर्ने घोषणापत्रमा उल्लेख छ ।
सम्मेलनमा मुख्यमन्त्री इन्द्र बानियाले सन्देशमा सालकलाई प्रदेशको गौरवको प्राणी घोषणा गरी यसको संरक्षणमा नीति कार्यक्रमसहितको उचित बजेट व्यवस्थापनको प्रतिबद्धता जाहेर गर्नु भएको धन्यवाद व्यक्त गर्दै सोको वैधानिकता प्रदान गर्न आवश्यक पहल गर्ने पनि सम्मेलनको निष्कर्ष छ ।
प्रकाशित मिति: सोमबार, माघ २६, २०८२
