जाजरकोट । बाँकेको नेपालगञ्जबाट रुकुम पश्चिमको आठविसकोट नगरपालिकाको राडिवजार जाँदै गरेको बस जाजरकोटको भेरी नगरपालिका १३ स्थित वराहचौर नजिकै दुर्घटना हुुदा ५ जनाको मृत्यु भएको छ भने २७ जना घाइते भएका छन् ।
ना ६ ख २७५७ नम्बरको रात्री बस कुदु बराहचौक नजिक दुर्घटना हुँदा ५ जनाको घटनास्थलमै मृत्यु भएको जाजरकोटका डीएसपी मधुकुमार थापाले जानकारी दिनुभयो ।
उहाँका अनुसार बसमा ३२ जना यात्रु थिए । घाइते रहेका २७ जनाको जिल्ला अस्पताल जाजरकोटमा उपचार भइरहेको छ ।
राति नै बस दुर्घटना भए पनि प्रहरी भने बिहान मात्रै घटनास्थल पुगेर उद्धारको काम सुरु गरेको थियो । घटनाको थप विवरण आउँन बाँकी रहेको र घटनाको विषयमा थप अनुसन्धान भइरहेको प्रहरीले बताएको छ ।
दुर्घटनामा मृत्यु हुनेहरुको परिचय खुल्न सकेको छैन ।
प्रकाशित मिति: आइतबार, मंसिर १२, २०७८, १०:१६
