पाल्पा । पाल्पाको तिनाउ गाउँपालिका-५ मा पहिरोले ६ घर बगाउँदा एक जनाको मृत्यु भएको छ भने एक बालक वेपत्ता भएका छन् ।
गएराति झरेको पहिरोका कारण सात जना घाइते भएका छन् । पहिरोले पुरिएर तिनाउ गाउँपालिका ५ का ४५ वर्षीय वीरबहादुर गुरुङको मृत्यु भएको जिल्ला प्रहरी कार्यालय पाल्पाले जनाएको छ ।
पहिरोमा स्थानीय पुजा परियारका चार वर्षीय छोरा वेपत्ता भएको र स्थानीय नरबहादुर राना, आकाश तामाङ, हरि दर्लामी, वीरबहादुर गुरुङ र रमेश परियारको घर पुरिएको स्थानीय कृष्ण पाण्डेले जानकारी दिनुभयो ।
घाइते भएकाहरुलाई कल्याणी आधारभूत विद्यालयमा राखेर उपचार भइरहेको र विस्थापितहरुलाई पनि सोही विद्यालयमा राखिएको स्थानीयले जनाएका छन् ।
हिजो रातिदेखि निरन्तर रुपमा परेको पानीले पाल्पा बुटवल सडकको सिद्धार्थ राजमार्गसमेत बन्द भएको छ । आधा दर्जनभन्दा बढी स्थानमा पहिरो खसेपछि राजमार्ग अवरुद्ध भएको हो ।
राजमार्गको राम्दीदेखि सिद्धबाबासम्म आधा दर्जनभन्दा बढी स्थानमा पहिरोले सडक अवरुद्ध भएको प्रहरीले जनाएको छ ।
तिनाउ गाउँपालिका अन्तरगतको कालीमाटी, हिउँदेखोला, झुम्सा, दोभान,लामेदमार, सिद्धबाबा, तथा रम्भा गाउापालिकाको वडा नं. ३ पिपलडाडाँ, वडा नं. ४ सेरामा पनि पहिरोले राजमार्ग अवरुद्ध भएको जिल्ला प्रहरी कार्यालय पाल्पाका सूचना अधिकारी रामेश्वर त्वातीले जानकारी दिनुभयो ।
अहिले पनि निरन्तर पानी परेका कारण सडक खुलाउन समेत समस्या भएको र प्रहरी घटनास्थल पुग्न सकेको छैन । सडक अबरुद्ध हुँदा पाल्पा, गुल्मी, अर्घाखाँची, स्याङ्जा, कास्की, पर्वत र बागलुङ पुग्ने सवारीसाधन र यात्रु अलपत्र परेका छन्।
प्रकाशित मिति: बिहीबार, असार २४, २०७८, ०८:५८
