काठमाडौँ । रसुवाको भोटेकोशी बाढीपछि प्रभावित क्षेत्रमा जारी खोज तथा उद्धार अभियानअन्तर्गत हालसम्म हवाई साधनमार्फत ४ हजार ८१ जनाको उद्धार गरिएको सैनिक जनसम्पर्क तथा सूचना निर्देशनालयले जनाएको छ।
सेनाका अनुसार आज साँझ ७ बजेसम्म मात्रै विभिन्न प्रभावित क्षेत्रबाट ८१ जनाको हवाई उद्धार गरिएको छ ।
हालसम्म उद्धार गरिएकामध्ये ३ हजार ७ सय ९८ जना नेपाली र २ सय ८३ जना विदेशी नागरिक रहेका छन्। बाढीका कारण क्षतिग्रस्त जलविद्युत् आयोजना तथा सुरुङ क्षेत्रमा भने खोज तथा उद्धार कार्य अझै जारी छ।
रसुवागढी जलविद्युत् आयोजनामा पावरहाउस र कन्ट्रोल पोइन्टसम्म पुगेर खोजी भइरहेको छ। रसुवा भोटेकोशी जलविद्युत् आयोजनाको रोङ्गास्थित केबल टनेलमा ड्रोनमार्फत गरिएको खोजीका क्रममा एउटा शव फेला परेको छ।
घटनास्थलमा थप खोजी कार्य भइरहेको नेपाली सेनाले जनाएको छ। लाङटाङ जलविद्युत् आयोजनामा पनि संयुक्त उद्धार टोलीले खोज तथा उद्धार कार्य जारी राखेको छ।
चिलिमे जलविद्युत् आयोजनामा विदेशीसहितको संयुक्त टोलीले चारवटा ६–६ मिटर लम्बाइका ठूला पाइप प्रयोग गरी हिँड्न मिल्ने बाटो निर्माण गरेको छ।
स्याफ्रुबेंसीदेखि आयोजनाको टनेलसम्म भारी उपकरण लैजान सडकमा रहेको ठूलो ढुंगा ब्लास्टिङ गरी हटाइएको छ। मुख्य चट्टानसम्म पुग्न अझै ९५ मिटर दूरी बाँकी रहेको जनाइएको छ।
संयुक्त टोली टनेलभित्र १ सय १५ मिटरसम्म प्रवेश गरेर खोजी गरिरहेको भए पनि हालसम्म केही फेला परेको छैन। माथिल्लो त्रिशूली–१ जलविद्युत् आयोजनामा विदेशीसहितको संयुक्त टोली मुख्य प्रवेश टनेलमा करिब ४०० मिटरसम्म प्रवेश गरी खोजी गरिरहेको छ।
त्यहाँ पनि हालसम्म केही फेला परेको छैन। त्रिशूली–३ ए जलविद्युत् आयोजनाको पावरहाउस तथा टनेलमा नेपाली सेनाका ३४ जना, सशस्त्र प्रहरी बलका चार जना र आयोजनाका प्रतिनिधिसहितको संयुक्त टोलीले खोजी गरिरहेको छ।
उक्त क्षेत्रमा पनि हालसम्म केही फेला परेको छैन। त्रिशूली–३ बी आयोजनामा नेपाली सेनाका १०१ जना तथा आयोजनाका प्रतिनिधिसहितको संयुक्त टोलीले तीनवटा एक्साभेटर प्रयोग गरेर खोजी गरिरहेको छ।
टोलीले आयोजनाको कार्यालय तथा आवास गृह क्षेत्रमा करिब २३ फिट गहिराइसम्म खनेर खोजी गर्दा हालसम्म केही फेला नपरेको जनाइएको छ।
तादी नदीमा पुल निर्माणको काम तीव्र बाढीबाट क्षतिग्रस्त पूर्वाधार पुनःस्थापनाका लागि पनि नेपाली सेनाले नुवाकोटको विदुर नगरपालिका–५ देवीघाटस्थित तादी नदीमा ५५ जनाको टोलीले पुल निर्माणलाई तीव्रता दिएको छ।
बाढीबाट क्षतिग्रस्तमध्ये मर्मत गर्न सकिने पाँचवटा झोलुङ्गे पुलको मर्मत कार्य भइरहेको छ भने थप १५ वटा झोलुङ्गे पुलको मर्मतका लागि तयारी भइरहेको छ। ढुंगे बुद्ध मन्दिरको तल्लो भागबाट त्रिशूली बजार जोड्ने करिब २५० मिटर लामो झोलुङ्गे पुल निर्माणका लागि नेपाली सेनाका इन्जिनियरको परामर्शसहित काम सुरु गरिएको छ।
मैलुङदेखि स्याफ्रुबेंसीसम्म पैदल गस्ती नेपाली सेनाले मैलुङदेखि स्याफ्रुबेंसीसम्म पैदल गस्ती गरी सम्भावित प्रभावित क्षेत्रमा खोजी तथा उद्धार गरिरहेको जनाएको छ।
त्रिशूली र धुन्चेमा स्थापना गरेका आपत्कालीन उपचार केन्द्र तथा मेडिकल पेट्रोलबाट हालसम्म ३ हजार ४ सय ८८ जनाले स्वास्थ्य सेवा प्राप्त गरेका छन्।
रसुवाको टिमुरेदेखि नुवाकोट, धादिङ, चितवन र नवलपरासी पूर्वका प्रभावित क्षेत्रसम्म नेपाली सेनाका ९ हजारभन्दा बढी फौज प्रत्यक्ष रूपमा परिचालन गरिएको छ।
उनीहरूले घाइते तथा प्रभावितको खोज तथा उद्धार, शव व्यवस्थापनमा सहयोग, राहत सामग्री ढुवानी, अवरुद्ध सडक तथा पुल सञ्चालनमा ल्याउने तथा आपत्कालीन उपचारलगायतका काम गरिरहेका छन्।
प्रकाशित मिति: मंगलबार, भदौ २३, २०८३
