काठमाडौं । प्रधानमन्त्री एवम् नेपाल कम्यूनिष्ट पार्टीका अध्यक्ष केपी शर्मा ओलीले नेपाल कम्यूनिष्ट पार्टी (नेकपा) विशाल नदी भएकोले यसबाट केही भंगालाहरु छुट्टिए पनि पुनः नदीमै आएर मिसिने बताउनुभएको छ ।
विभिन्न पार्टी परित्याग गरी नेकपा प्रवेश गरेकाहरुलाई आज पार्टी केन्द्रीय कार्यालय धुम्बाराहीमा स्वागत गर्दै ओलीले यस्तो बताउनुभएको हो ।
प्रधानमन्त्री ओलीले नदी बग्दा केही भंगालाहरु बाटा भूलेर दायाँबायाँ लागे पनि अलि पर पुगेर सबै भंगाला मुल बहाबमा नै मिसिने बताउनुभयो ।
“कहिले ढिस्काले बाटो छेकेर भंगालाहरु यताउति लाग्छन्, कहिले बाटो भूलेर” प्रधानमन्त्री ओलीले भन्नुभयो “पुल मुनी भंगालै भंगालामा छरिएको नारायणी नदी अलि तल पुगेपछि मुल बहावमै मिसिन्छन् । त्यस्तै कम्यूनिष्ट पार्टीबाट बेला बेलामा छुट्टिएर गएका साथीहरु अहिले मुलधारमै आउनु भएको छ । उहाँहरुलाई स्वागत छ ।”
प्रधानमन्त्री ओलीले दुई तिहाई अटेको कम्यूनिष्ट पार्टीमा बाबुराम भट्टराई मात्र नभइ सिङ्गै समाजवादी पार्टी पनि अट्न सक्ने बताउनुभयो ।
प्रधानमन्त्री ओलीले दुई तिहाई अटेको कम्यूनिष्ट पार्टीमा बाबुराम भट्टराई मात्र नभइ सिङ्गै समाजवादी पार्टी पनि अट्न सक्ने बताउनुभयो ।
“देश बनाउने बेलामा डिलमा बसेर मतभेद गर्ने होइन । आउनुहोस् सबै मिलौं देश बनाउँ ” प्रधानमन्त्री ओलीले भन्नुभयो । नेपालमा पहिले राजनीतिका मात्र कुरा हुने गरेकोमा अहिले विकासका कुराले प्रधानता पाउन थालेको प्रधानमन्त्री ओलीको भनाइ छ ।
“जनताका समस्या भन्दा सरकार टाढा छैन । जनताका आवश्यकतालाई मनन गरेर हामी काम गर्छौं ” प्रधानमन्त्री ओलीले भन्नुभयो “हामीमा कुनै मतभेद छैन । व्यक्तिगत स्वार्थलाई गौंण र राष्ट्रिय स्वार्थलाई प्राथमिकतामा राखेर विकसित देश बनाउन हामी लागि परेका छौं ।”
प्रधानमन्त्री ओलीले केही केहीले परपरैबाट पार्टी र सरकारको आलोचना गर्ने गरेको समेत बताउनुभयो ।
प्रधानमन्त्री ओलीले केही केहीले परपरैबाट पार्टी र सरकारको आलोचना गर्ने गरेको समेत बताउनुभयो ।
“बहुदलमा आलोचना गर्न पाइन्छ । चुनाव पनि हार्नु आलोचना पनि गर्न नपाउनु त भएन नि” ब्यङ्ग्यात्मक शैलीमा ओलीले भन्नुभयो “जति आलोचना गरे पनि सरकार देशमा सुशासन कायम गर्ने अभियानमा दृढ संकल्पित छ । ”
कार्यक्रममा नेपाल समाजवादी पार्टीका नेताहरु कल्पना धमला, देवेन्द्र पराजुली, गुणखर भूसाल, मनु हुमागाईं लगायत नेकपामा प्रवेश गर्नुभएको छ । उहाँहरुलाई अध्यक्ष ओली तथा अर्का अध्यक्ष पुष्पकमल दाहाल प्रचण्डले पार्टी प्रवेश गराउनु भएको हो ।
प्रकाशित मिति: शुक्रबार, असार २०, २०७६, १४:१४
