काठमाडौँ । राष्ट्रिय विपद् जोखिम न्यूनिकरण तथा व्यवस्थापन प्राधिकरणका अनुसार हालसम्म १ हजार ३ सय ९९ जनाको रसुवा भोटेकोशी बाढीमा परी मृत्यु भएको छ ।
५ हजार १ सय ७९ जना बेपत्ता रहेको प्राधिकरणको भनाइ छ । १३ हजार ७ सय ४२ जनाको उद्धार गरिएको र घाइतेमध्ये ३ सय ४३ जनाको विभिन्न अस्पतालमा उपचार भएको छ ।
डीएनए परीक्षणमार्फत शव पहिचानको काम जारी रहेको प्राधिकरणको भनाइ छ । प्रभावित क्षेत्रबाट सङ्कलित नमूनाहरू सम्बन्धित जिल्ला प्रहरी कार्यालयमार्फत परीक्षणका लागि पठाइएका छन् ।
बाढीपछि रसुवा, नुवाकोट र धादिङ गरी ३० वटा केन्द्रमा कुल २ हजार १ सय ५५ जना प्रभावितले आश्रय लिइरहेका छन् ।
सरकारले होल्डिङ सेन्टरमा बस्न नचाहने परिवारलाई वैकल्पिक बसोबासको व्यवस्था नभएसम्म अधिकतम ६ महिनासम्म मासिक नगद राहत दिने निर्णय यसअघि नै गरिसकेको छ ।
चार जनासम्मको परिवारलाई प्रति महिना १५ हजार रुपैयाँ र थप सदस्य भएमा प्रति व्यक्ति २ हजार रुपैयाँ उपलब्ध गराइने व्यवस्था गरिएको छ।
प्रभावित क्षेत्रमा १९ वटा स्वास्थ्य संस्थामार्फत उपचार सेवा दिइएको छ । ९ सय ३४ जनालाई मनोसामाजिक परामर्श सेवा उपलब्ध गराइएको पनि प्राधिकरणको विवरणमा उल्लेख छ।
प्रकाशित मिति: बुधबार, भदौ ३१, २०८३
