काठमाडौँ । ‘कर्णालीको पत्रकारिता’ शीर्षकको पुस्तक काठमाडौँमा सार्वजनिक गरिएको छ ।
कर्णाली क्षेत्रका अग्रज पत्रकार, लेखक तथा अनुसन्धानकर्ताहरूको उपस्थितिमा प्रेस काउन्सिल नेपालको सभाकक्षमा आयोजित एक कार्यक्रमबीच पुस्तक सार्वजनिक गरिएको हो।
कार्यक्रममा प्रेस काउन्सिल नेपालका पूर्वअध्यक्ष बालकृष्ण बस्नेतले नेपाली पत्रकारिताको इतिहास अनुसन्धान तथा अभिलेखीकरणको काम कर्णालीबाट सुरु भएकोमा खुसी व्यक्त गर्नुभयो ।
उहाँले सीमित स्रोतसाधनका बाबजुद धर्म, संस्कृति र इतिहासका विषय भावी पुस्तालाई हस्तान्तरण गर्न यो पुस्तक कोशेढुङ्गा साबित हुने धारणा राख्नुभयो।
पुस्तकका लेखक नवराज महताराले विभिन्न कठिनाइ र सीमित स्रोतसाधनका बाबजुद पुस्तक तयार पारिएको बताउँदै यसमा रहेका कमीकमजोरीलाई आगामी दिनमा सुधार गर्दै लगिने बताउनुभयो।
पुस्तकका बारेमा काउन्सिलका पूर्वसदस्य मनऋषि धितालले समीक्षात्मक टिप्पणी राख्नुभयो।
कार्यक्रममा कर्णाली क्षेत्रका अग्रज पत्रकार तथा लेखकहरू मनऋषि धिताल, समीरजङ्ग शाह, रुद्र खड्का, डा. मानबहादुर रोकाय, खेमराज ओली, विद्याप्रसाद उपाध्याय, चेतनारायण पाण्डेय, मेगराज खड्का, चक्र दानी, लक्ष्मी केसी, राजबहादुर शाही, हरिहर न्यौपानेलगायतले कर्णालीको पत्रकारिताबारे आ–आफ्नो अनुभव तथा धारणा राख्नुभयो।
काउन्सिलका मुख्य अधिकृत झबिन्द्र भुसालले सहजीकरण गर्नुभएको कार्यक्रममा उहाँले पुस्तक लेखन, सम्पादन तथा प्रकाशनका विभिन्न चरणमा भएको मेहनतको स्मरण गर्दै सम्बद्ध सबैप्रति आभार व्यक्त गर्नुभयो।
प्रकाशित मिति: बुधबार, भदौ ३१, २०८३
