सर्लाही । सर्लाहीको हरिवनस्थित चापिनी खोलामा डाइभर्सन बगाएपछि आज बिहान ४ बजेदेखि पूर्वपश्चिम राजमार्ग अवरुद्ध रहेको छ ।
राति परेको ठूलो पानीका कारण चार लेनमा विस्तार भइरहेको पूर्वपश्चिम राजमार्ग अन्तर्गत हरिवनको तीनघरे र बासाटोलको बिचमा पर्ने चापिनी खोलाको डाइभर्सन बगाउँदा राजमार्ग नै अवरुद्ध बनेको हो ।
पुरानो पुललाई मर्मत गर्ने र छेउमै अर्को पुल बनाउने काम भइरहेकाले डाइभर्सनबाट सवारीसाधन आउजाउ गर्दै आइरहेका थिए ।
डाइभर्सन बगाएसँगै अब पूर्वपश्चिम राजमार्गकै पुरानो पुलको मर्मत कार्य रोकेर सोही पुलबाट यातायात सूचारु गर्न माटो भर्ने काम भइरहेको इलाका प्रहरी कार्यालय हरिवनका प्रहरी निरीक्षक चन्द्रकान्त अधिकारीले जानकारी दिनुभयो ।
इन्स्पेक्टर अधिकारीका अनुसार बाढीले बगाएको डाइभर्सन निर्माण गर्न भने समय लाग्ने अवस्था छ ।
सर्लाहीमा अहिले पूर्वपश्चिम राजमार्गको दर्जनौँ स्थानमा डाइभर्सन गाड पास गराइ बक्स कलभर्ट र पुल निर्माण गर्ने काम भइरहेको छ ।
बिहान २ बजेपछि परेको ठूलो पानीका कारण पानी जम्ने र हिलाम्मे भएकाले अन्य ठाउँको डाइभर्सनबाट पनि कष्टपूर्ण किसिमले सवारी साधन सञ्चालन भइरहेका छन् ।
कमला–ढल्केबर–पथलैया सडक योजना (पूर्वी खण्ड) ले बर्खायामअघि नै पुल र कलभर्टको काम सम्पन्न गरिने जनाएको छ ।
निरन्तर पानी पर्न थालेपछि हाइवेमा डाइभर्सन गरेर गाडी चलाउन सम्भव नहुने भएकाले सडक भन्दा पुल र कलभर्टको काम प्राथमिकताका साथ भइरहेको आयोजनाका सूचना अधिकारी एवं इन्जिनियर रामटहल यादवले बताउनुभयो ।
प्रकाशित मिति: बिहीबार, चैत २६, २०८२
