सर्लाही । रौतहट र मकवानपुरको सीमा भएर बग्ने बागमती नदीले बगाएर बेपत्ता दुई युवक आइतबार दिउँसो मृत फेला परेका छन्।
बागमती नदीले बगाएर सर्लाहीको लालबन्दी नगरपालिका ५ का २१ वर्षीय गणेश महतो र लालबन्दी नगरपालिका ९ का १८ वर्षीय रोहित महतो शनिबार दिउँसोदेखि बेपत्ता भएका थिए । घटना भएको करिव २४ घण्टापछि दुवै युवक पानीमा तैरिरहेको अवस्थामा मृत फेला परेका हुन् ।
रोहितको शव बागमती सिँचाई आयोजनाको ड्याम भन्दा तल खोलामा र गणेशको शव ड्यामभन्दा उत्तरतर्फ बागमती नगरपालिका ११ मा फेला परेको इलाका प्रहरी कार्यालय हरिवनका प्रहरी निरीक्षक चन्द्रकान्त अधिकारीले जानकारी दिनुभयो।
स्थानीय वासिन्दा, युवकको परिवार र सुरक्षाकर्मी भएर खोजी गर्नेक्रमाम खोलाले बगाएर बेपत्ता दुवै युवकको शव फेला परेको हो । दुवै युवक साथीसँगै शनिबार दिउँसो नुनथर क्षेत्रमा घुमफिरका लागि गएको समयमा बागमती खोलाले बगाएर बेपत्ता भएका थिए । अन्य तीन जना युवा खोला तर्न सफल भएपनि रोहित र गणेश भने डुबेर बेपत्ता भएका थिए ।
रोहित र गणेशलाई बगाएकोे क्षेत्रमा बारम्बार यस प्रकारको दुर्घटना हुने गरेको छ । नुनथर र बागमती सिँचाईको ड्याम आसपास खोलामा पौडी खेल्न निषेध रहे पनि अन्यत्रबाट आउने युवा पौडी खेल्न पस्ने गरेकाले बारम्बार दुःखद् घटना हुने गरेको स्थानीयले बताएका छन् ।
प्रकाशित मिति: आइतबार, जेठ १०, २०८३
