सर्लाही । सर्लाही क्षेत्र नम्बर ४ बाट राष्ट्रिय स्वतन्त्र पार्टी (रास्वपा) का उम्मेदवार डा अमरेशकुमार सिंह निर्वाचित हुनुभएको छ ।
सिंह नेपाली काँग्रेसका सभापति गगनकुमार थापालाई १२ हजार ८ सय ५७ मतको फराकिलो अन्तरले पराजित गर्दै लगातार चौथो पटक सर्लाही ४ बाट प्रतिनिधि सभा सदस्यमा चुनिनु भएको हो ।
सिंह ३५ हजार ६ सय ८८ मत प्राप्त गरी विजयी हुँदा निकटतम प्रतिस्पर्धी थापालाई भने २२ हजार ८ सय ३१ मत प्राप्त भयो । सिंह यसअघि नेपाली काँग्रेसबाट दुई पटक र २०७९ मा स्वतन्त्र उम्मेदवारी दिएर प्रतिनिधि सभा सदस्यमा निर्वाचित हुनुभएको थियो ।
यो पटक नेपाली काँग्रेसले प्रधानमन्त्रीको उम्मेदवारसमेत घोषणा गर्दै सभापति थापालाई सर्लाही ४ बाट उठाएपछि सिंहलाई अप्ठेरो परेको आँकलन गरिएको थियो ।
तर यसअघि भन्दा झन धेरै मतसहित सिंहले संसदको यात्रा तय गर्न सफल हुनुभएको हो ।
सर्लाही ४ मा विभिन्न राजनीतिक दलका शीर्ष नेताहरु नेपाली कांग्रेसमा प्रवेश गरेर सभापति थापाको पक्षमा माहोल बनाउन क्रियाशील हुँदा हुँदै पनि देशभर रास्वपाप्रति जनलहर देखिँदा डा. सिंहले चौंथो पटक सांसद बन्ने पौका प्राप्त गर्नुभएको हो ।
केहीबेरअघि अन्तिम मतपरिणाम सार्वजनिक भएसँगै सिंहलाई निर्वाचन अधिकृतको कार्यालयले प्रमाण–पत्र प्रदान गर्ने तयारी गरेको छ ।
क्षेत्र नं. ४ को नतिजासँगै सर्लाहीको चारवटै निर्वाचन क्षेत्रमा रास्वपाले ‘क्लिन स्वीप’ गरेको छ ।
प्रकाशित मिति: आइतबार, फागुन २४, २०८२
