रुकुम पूर्व जिल्ला प्रशासन कार्यालय रुकुम पूर्वले जिल्लाका उच्च पहाडी तथा हिमाली क्षेत्रमा परेको भारी हिउँ परेका कारण जनजीवन प्रभावित भएको जनाउँदै उच्च सतर्कता अपनाउन सबैलाई आग्रह गरेको छ ।
प्रशासनका अनुसार िहजाे रातिदेखि परेको हिउँका कारण मध्यपहाडी लोकमार्गसहित विभिन्न स्थानमा अवरोध सिर्जना भएको छ भने सवारी आवागमनसमेत प्रभावित भएको छ । हिमपातको जोखिमलाई मध्यनजर गर्दै स्थानीय बासिन्दालाई सुरक्षित रहन, अत्यावश्यक कामबाहेक यात्रा नगर्न तथा काम विशेषले यात्रा गर्नुपर्ने अवस्थामा विशेष सावधानी अपनाउन अनुरोध गरिएको छ ।
हिमपातका कारण सडक अवरुद्ध भई यातायात सञ्चालनमा समस्या देखिएकाले जिल्लास्थित यातायात व्यवसायीलाई मौसमको पूर्वानुमानको आधारमा मात्र सवारी साधन सञ्चालन गर्न पनि प्रशासनले आग्रह गरेको छ ।
त्यस्तै, हिउँ खेल्न आउने, हिमाल आरोहण तथा पदयात्रामा निस्कने आन्तरिक तथा बाह्य पर्यटकलाई समेत उच्च सतर्कता अपनाउन जिल्ला प्रशासन कार्यालयले अनुरोध गरेको छ । सहायक प्रमुख जिल्ला अधिकारी समिर गौतमद्वारा हस्ताक्षरित सूचनामा सम्भावित जोखिम न्यूनीकरणका लागि सबै सरोकारवालालाई जिम्मेवार र सचेत रहन आग्रह गरिएको छ ।।
प्रकाशित मिति: बुधबार, माघ १४, २०८२
